Futbolda bu da qadağan edildi

Almaniya bundesliqasının oyunlarında spreydən istifadə yasaqlanıb.

Bu barədə Almaniyanın "Bild" qəzeti yazır.

Xəbərə görə, ilk dəfə son Dünya Futbol Çempionatında istifadə edilən və daha sonra UEFA Çempionlar Liqasında və İngiltərə, Fransa, İtaliya, İspaniya futbol birinciliklərində tətbiq olunan "hoparaq-itən köpüklü boya"nın təhlükəli olduğu bildirlir.

Spreyin tərkibində kanserogen maddənin olması barədə iddialar səsləndirilir.

FIFA-nın bütün ölkələrdə yararlanılmasını tövsiyə etdiyi köpüklü boya (sprey) tərkibində ziyanlı "paraben" adlı kimyəvi maddənin olduğu aşkar edilib. Boya qutusunun üzərində açıq-aydın xəbərdarlığın olmadığı və spreydəki maye miqdarının Avropa standartlarına uyğun gəlmədiyi deyilir.

"Paraben" bir çox kosmetik məhsullarda istifadə edilən, ucuz və zərərli bakteriyaların qarşısını alan, həm də məhsulun ömrünü uzadan kimyəvi maddədir. Bununla belə, bir çox araşdırmalar, o cümlədən Edinburq Universiteti onkologiya mütəxəssislərinin araşdırması 20 müxtəlif xərçəng şişinin 18-də bu maddənin olmasını üzə çıxarıb.

Almaniya Futbol Federasiyası "köpüklü boya"dan yararlananlara cərimə edəcək.

Almaniya "köpüklü boya"nı yasaqlayan ilk ölkədir. Başqa ölkələrdən, hələ ki, hər hansı şikayət səslənməyib.

Qeyd edək ki, sprey hakimlər tərəfindən futbolçuların cərimə zərbəsi zamanı dayanacağı yeri və topu işarələmək üçün istifadə edilir. Sprey vurulduğu andan bir neçə dəqiqə sonra yoxa çıxır. (anspress)

Ölkə.Az