“Qapımızda 3 qol görə bilərik”
Çempionlar Liqasınln 2-ci tәsnifat mәrhәlәsindә "Qarabağ" "Düdelanj"ı 2:0 hesabı ilә mәğlub edib.
Ölkə.Az Qafqazinfo-ya istinadən xəbər verir ki, oyundan sonra "Qarabağ"ın baş mәşqçisi Qurban Qurbanov mәtbuat konfransında çıxış edib.
- Oyun haqqında fikirlәriniz?
- Həm asan, həm çətin oyun oldu. Rəqibin oyunu göstərdi ki, matça yaxşı hazırlaşmışdılar. Rəqibimizdə alman ruhu var idi. “Düdelanj” çətin rəqibdi. Səfərdə ən çətin matçlarımızdan birini keçirəcəyik. Düşünürəm ki, rəqib cavab matçında çox yaxşı mübarizə aparacaq. Lüksemburqdakı stadionun durumu da yaxşı deyil. İnanıram ki, bu durum yaxın günlərdə müsbətə doğru dəyişəcək. Cavab oyununda həddindən artıq ciddi olmalıyıq. Hər iki komandaya uğurlar diləyirik.
- İki fərqli hissə izlədik. İkinci hissədə sönük oyuna səbəb nə idi?
- Komanda ideal vəziyyətdə deyil. İkinci hissədə rəqib fərqli futbol oynadı və biz də onların sisteminə uyğun hərəkət etdik. Komandamız ikinci hissədə də qol vurmaq istəyirdi. Səbrli olmaq və düzgün hücumlar qurmağa çalışdırdıq.
- Arif Daşdəmirov və Əl Hərbinin oynamamasına səbəb nə idi?
-İmkanım olsaydı bütün futbolçulara şans verərdim. Futbolçularımız oynamağa hazırdı. Gələcək oyunlarda heyətdə dəyişiklik edə bilərik.
- “Düdelanj”ın cavab oyununda “Qarabağ”a 3 qol vura biləcəyinə inanırsınız?
- İndi futbolda mümkünsüz heç nə yoxdu. Əgər səfərdə meydana arxayın çıxsaq qapımızda 3 qol görə bilərik. Çünki “Düdelanj” bunu bacara biləcək komandadı. Dediyim kimi, daha diqqətli futbol oynamalıyıq.
