“Bir tərəfdən Rusiya, digər tərəfdən Azərbaycan...”
Bakıda keçirilən 42-ci Ümumdünya Şahmat Olimpiadası davam edir. Bu gün olimpiadanın media mərkəzində FİDE-nin prezidenti Kirsan İlyumjinov mətbuat konfransı keçirib.
Bakı Şahmat Olimpiadasının mətbuat xidmətindən Ölkə.Az-a daxil olan məlumata görə, beynəlxalq qurumun rəhbəri ilk olaraq ölkəmizdə keçirilən olimpiadanın yüksək təşkilatçılığından söz açıb: “İlk növbədə Azərbaycan dövlətinə, ölkə başçısı cənab İlham Əliyevə təşəkkür edirəm. Bakıda Ümumdünya Şahmat Olimpiadasının və FİDE-nin konqresinin təşkili üçün hər cür şərait yaradılıb. 4 il əvvəl FİDE-nin üzvləri olimpiadanın Bakıda keçirilməsinə yekdilliklə səs vermişdilər. Azərbaycan bu etimadı artıqlaması ilə doğruldub. Bu, FİDE-nin tairixində ən yaddaqalan olimpiadalardan biri, bəlkə də birincisidir. Təşkilatçılıq çox yüksək səviyyədədir. Qonaqların gəlişi, qarşılanması, otellərdə yerləşdirilməsi, qidalanma, yarış zalı, jurnalistlərin iş otağı - bütün bunlar ən yüksək səviyyədə təşkil edilib”.
Kirsan İlyumjinov Bakıda baş tutacaq FİDE konqresində bir çox vacib qərarların qəbulunun gözlənildiyini söyləyib: “Qarşıdakı günlərdə FİDE-nin Konqresi start götürcək. Burada bir çox məsələlər müzakirə olunacaq. Şahmatın inkişafı yolunda mühüm addımların atılacağına inanırıq”.
O, Azərbaycanın gələcəkdə də ən böyük şahmat yarışlarına ev sahibliyi edə biləcəyini söyləyib: “Qonaqlar Bakıda özlərini çox rahat hiss edirlər. FİDE rəsmiləri hər zaman Bakıda olmağa hazırdılar. Bizi burada çox yaxşı qarşılayırlar. İstənilən şahmatçıdan soruşun, iki əlli Bakının ən böyük yarışlara ev sahibliyi etməsinə razı olacaq. Bu barədə müzakirələrimiz olub. Gələcəkdə uşaqlar arasında olimpiadanı Bakıda təşkil edə bilərik”.
Kirsan İlyumjinov olimpiadada hansı komandaya azarkeşlik etməsi ilə bağlı sualı belə cavablandırıb: “Rusiya vətəndaşıyam. Digər tərəfdən də Azərbaycanda qonağıq. Azərbaycana necə azarkeşlik etməyək? Bir tərəfdən Rusiya, digər tərəfdən Azərbaycanın qələbə qazanmasını istərdim. Qonaq komandalar hamısı mənə yaxınlaşaraq müxtəlif suallar verir. Onlara da dəstək olmaq lazımdır. FİDE-nin üzvü olan bütün ölkələrə azarkeşlik edəcəyəm”.
