Olimpiya çempionuna yüksək vəzifə verildi
Olimpiya və dünya çempionu, sabiq güləşçi Fərid Mansurov yeni vəzifəyə təyin olunub.
Ölkə.Az-ın Apasport-a istinadən məlumatına görə, Afina Yay Olimpiya Oyunlarının qızıl mükafatçısı Gənclər və İdman Nazirliyində fəaliyyət göstərəcək.
Mansurov nazirliyin idman şöbəsinin müdiri vəzifəsini icra edəcək. O, Mirkamil Rəhimovun dünyasını dəyişməsindən sonra boş qalmış posta təyin edilib.
Məlumatı Gənclər və İdman Nazirliyinin mətbuat xidmətinin rəhbəri Səmayə Məmmədova da təsdiqləyib.
Qeyd edək ki, tanınmış idmançı 2004-cü il Yay Olimpiya oyunlarında yunan-roma güləşi üzrə 66 kq çəki dərəcəsində qızıl medalına sahib olaraq Olimpiya çempionu adını qazanıb. 2007-ci ildə Bakıdakı dünya çempionatında qızıl medal qazanıb.
F.Mansurov Azərbaycan Respublikası Prezdidentinin Sərancamları ilə 2002-ci ildə “Tərəqqi” medalı ilə, 2004-cü ildə isə “Şöhrət” ordeninə layiq görülüb.
