XV Yay Paralimpiya Oyunlarının açılışı olacaq
Bu gecə 2016-cı il Rio-De-Janeyro Yay Paralimpiya Oyunlarının açılış mərasimi start götürəcək.
Ölkə.Az-ın məlumatına görə, Bakı vaxtı ilə saat 01:15-də başlanacaq mərasim "Marakana" stadionunda təşkil ediləcək. Açılış tədbirində Azərbaycanın bayrağını cüdo üzrə ikiqat paralimpiya çempionu, "Bakı 2015" I Avropa Oyunlarının qalibi, eləcə də 2 qat dünya və 6 qat Avropa çempionu İlham Zəkiyev aparacaq.
Qeyd edək ki, Paralimpiya yarışlara sentyabrın 8-dən start götürəcək. Azərbaycan XV Yay Paralimpiya Oyunlarında 27 paralimpiyaçı ilə təmsil olunacaq ki, onların da 6-sı qadındır. İdmançılar cüdo, atletika, üzgüçülük, güllə atıcılığı, kamandan oxatma və pauerliftin növlərində 44 medal uğrunda mübarizə aparacaqlar.
Nümayəndə heyəti Rio-de-Janeyroya sentyabrın 2-də yola düşüb. Sentyabrın 5-də Paralimpiya Kəndində Azərbaycan bayrağının qaldırılma mərasimi keçirilib.
Paralimpiada sentyabrın 18-də başa çatacaq.
