Ramin Musayev 14 klubu çətin duruma necə saldı?

Bildiyiniz kimi bu gün futbol üzrə Azərbaycan çempionatının birinci dəstəsində yeni mövsümün startı veriləcək.

Ölkə.Az-ın məlumatına görə, on dörd komandanın çıxış edəcəyi kollektivlər arasında güclülər dəstəsində illərlə çıxış etmiş "Turan", Rəvan", "İmişli" kimi klublarla yanaşı, yenə yaradılmış "Səbail" də var. Mövsüm öncəsi hər komanda büdcəsinə uyğun transferlər edib gücləniblər. Bu arada qeyd edək ki, birinci dəstə klublarına iki legioner futbolçunu start heyətində meydana buraxmağa icazə verilib. Əsas şərtlərdən biri isə ən azı 5 oyunçunun (1994-cü il və aşağı təvəllüd) gənc olması idi ki, komandalar da məhz bu qaydalara uyğun heyət formalaşdırmışdllar.

Hətta iki aydan çoxdur ki, hər kəs bu sistemə uyğun heyət qurmaqla yanaşı, məşq prosesləri keçirilirdi.

Yeri gəlmişkən, komandalara bu təlimat PFL rəhbəri Ramin Musayevin göstərişinə əsasən verilmişdi. Bu sistem özlüyündə nə deməkdir? Deməli, bu komandaların transfer etdiyi yaşı 23-dən yuxarı oyunçuların əksəriyyəti ehtiyatda qalacaqlar.

Dünən isə AFFA-da limit haqda yeni qərar qəbul olunub. Belə ki, əsas heyətdə beş yerli gənc futbolçu (1994-cü il və daha aşağı yaş), yaş məhdudiyyəti olmayan dörd yerli oyunçu və iki legionerin çıxış etməsinə icazə veriləcək

Bəs bu hansı anlama gəlir? Deməli, transfer olunan yaşlı oyunçular ehtiyatda qalmaqla bərabər, gənc oyunçu axtarışına başlanılacaq. Absurd qərar və özbaşınalıq. Bütün hüquq normalarını FİFA və UEFA-nın təsdiq etdiyi aşağı liqada belə özbaşınalığın olması yəqin ki, başqa heç bir ölkədə mümkün deyildi.

Dünyanın heç bir federasiya rəhbərliyi birinci dəstə komandasının sponsoruna əmr edə bilməz ki, hansı yaşda olan futbolçunu oynat, filan oyunçunu oynatma.

Düzdür, Ramin Musayevin geriyə atdığı addımların çox şahidi olmuşuq. Amma bu qədərini ağıla gətirmək olmazdı.

Görünən budur ki, klubların çox AFFA-fan maliyyələşdiyi üçün heç kim səsini çıxara bilmir. Başqa sübutunu tapan məsələ isə ondan ibarətdir ki, Elxan Məmmədov bu dəfə də Musayev üzərində qələbə çalmış oldu. Çünki limit məsələsi də birbaşa onun ixtiyarındadır. Əgər limit bir günə dəyişilə bilirsə, onda İcraiyyə Komitəsi kimə və nəyə lazımdır? Ancaq səs vermək və alətə çevrilmək üçünmü?

Burada veteranlardan danışmaq yersizdir. Çünki onların əksəriyyəti yox kimidirlər. Kimi təqaüdlə, kimi vəzifəylə susdurulmuş veteranlar....

Hər halda 32 minlik əhalisi olan və azlıqda qalan komandaya (San Marino) hıqqına-hıqqana bir top vuran millimiz, Maltaya Bakıda 1 xal bəxş edən U-21 komandamız....Vəziyyət gün kimi aydındır

Ramin Musayevin keçiridiyi çempionatı istədiyi qədər saxlayan, dayandıran Elxan Məmmədov PFL-ə də rəhbərlik edə bilər. Əgər Musayevin sözünün kəsəri yoxdursa, onda 45 işçisi olan bu qurum kimə lazımdır və qohum-əqrəba yığını olan PFL-i saxlamaq hansı maraqlara xidmət edir?

İntiqam VALEHOĞLU
Ölkə.Az