\"Hamımız çox kədərliyik\"
UEFA Avropa Liqasının qrup mərhələsinin son turunda "Fiorentina" ilə qarşılaşan "Qarabağ" 1:2 hesabı ilə məğlub olaraq qrupda qaldı.
Ölkə.Az bildirir ki, oyundan sonra ağdamlıların icraçı direktoru Əmrah Çəlikəl jurnalistlərə müsahibəsində apasport.az saytının əməkdaşının da suallarını cavablandırıb.
- Oyun haqqında fikirlərinizi bölüşərdiniz...
- Maraqlı oyun oldu. Qələbə istəyirdik. Hava şəraitinə baxmayaraq, azarkeşlərin möhtəşəm dəstəyini gördük. Gözəl ab-hava var idi. Cavab qolundan sonra ümidlənsək də, nəticə ürəyimizcə olmadı.
- Düşünmürsünüz ki, uğursuzluqda əsas səbəb futbolçu çatışmazlığı və yeni transferlərin olmamağıdı?
- Xeyr, elə düşünmürəm. Bizim iki futbolçumuz cəzalı idi. Bu gün oyunçu cəhətdən hər hansı bir problemimiz yoxdu. İstədiyimiz əksər transferləri həyata keçirmişik.
- "Fiorentina" ilə görüşdə Mahir Mədətov kimi gəncin meydana çıxması...
- Məncə, Mahir üçün də, Azərbaycan futbolu üçün də bu, böyük şansdı ki, gənc futbolçu belə bir məsul qarşılaşmada meydana çıxır.
- Ölkə çempionatında legioner limiti olmasaydı, əcnəbi transfer edə bilərdiniz?
- Məncə, burda transfer haqqında danışmamalıyıq. Hamımız çox kədərliyik. Onu deyim ki, transfer baxımından hansısa bir çətinliyimiz olmayıb. Əsas məsələ o deyil, bu oyundakı məğlubiyyətimizdi.
- Artıq üçüncü dəfədi komanda son anda büdrəyir. Sizcə, əsas səbəb nədi?
- Müəyyən qədər təcrübə çatışmazlığı da var. Şanssızlıq da oldu. Əsas qırılma nöqtəsi "Slovan"a səfərdəki 0:3 hesablı məğlubiyyət oldu.
- Bəlkə bir az da arxayınçılıq oldu? Sona iki tur qalmış hər şey bizim xeyrimizə idi...
- Yox, arxayınçılıqdan söhbət gedə bilməz. Komandadakı ab-hava buna imkan vermir. Baş məşqçimiz bu haqda oyunçuları xüsusi hazırlayır. Arxayınçılıq deməzdim, sadəcə təcrübə çatışmazlığı və şanssızlıq əsas rol oynadı.
- "Qarabağ" iki dəfə PAOK-a qalib gəldi, ancaq qrupdan yunanlar çıxdı. Bu, ədalətsizlikdi?
- Yox, ədalətsizlik deyil. Deməli, belə olmalı imiş. PAOK da getdi "Fiorentina"ya qalib gəldi, indi də öz meydanında "Slovan"ı məğlub etdi. Əgər bu gün həmin oyun fərqli bitsəydi, biz də heç-heçə etsəydik, qrupdan çıxacaqdıq.