"Azərbaycanda oynasa, ən güclü mərkəz hücumçusu olar"

- Birinci hissədən sonra yenilənmiş "Neftçi" necə təsir bağışladı?

- Oyun baxımından fərq hiss olunur. Düzdü, qolu fərdi səhvdən sonra vurdular, ancaq irəliləyiş göz önündədi. Düşünürəm ki, ikinci hissə daha maraqlı olacaq.

- Renat Dadaşovla bağlı fikirləriniz maraqlıdı. Növbəti toplanışda komandada yer alacaqmı?

- Renatla bağlı çox məlumatım yoxdu, yaxşı tanımıram. Cəmi bir matçını izləmişəm. 17 yaşı var, çox gəncdi. Ümid edirəm ki, bizə çox köməyi dəyəcək. İndiki halda nəsə deyə bilmərəm.

- Ozancan Kökcü haqqında nə düşünürsüz? Yaxın zamanda onu əsas millidə görə biləcəyikmi?

- Ozancan haqqında məlumat toplamışam, ümumiyyətlə, U-21-in üzvləri son toplanışda yaxşı çıxış etməyiblər. Bugünkü halda gənclərdən heç kim əsas milliyə yüksəlməyə hazır deyil. Orda elə keyfiyyətli oyunçu yoxdu ki, əsas yığmanı gücləndirsin.

- Ramil Şeydayevin gələcəyi ilə barədə narahatsımızmı? Nə məsləhət görürsünüz ona?

- Sözsüz ki, oynaya biləcəyi bir kluba keçməlidi. Çünki oyun təcrübəsi çox önəmlidi. Milli üçün çox vacibdi ki, onun praktikası olsun. Mən məsləhət görərdim ki, oynayacağı kluba keçsin, ancaq təbii ki, son söz yenə də "Trabzpnspor"undu.

- Şeydayevin vəziyyəti ilə bağlı bir dəyişiklik olmasa, qarşıdakı oyuna dəvət alacaqmı?

- Ramil çox böyük futbolçu keyfiyyətlərinə malikdi. Mən deyərdim ki, bu gün Azərbaycan çempionatında çıxış etsə, ən güclü mərkəz hücumçusu olar. Təəssüf ki, bu gün müntəzəm çıxış edə bilmir, ancaq millinin iki matçında özünü çox yaxşı tərəfdən göstərdi. Mən ona da heyfsilənirəm ki, bizim legionerlərimiz, Nazarov, Mahmudov, Eddi və ya Şeydayev xaricdə öz klublarında əsas heyət üzvləri deyillər. Daimi oyun praktikasının azlığından əziyyət çəkirlər.

- "Bursaspor"la danışıqlar prosesi haqqında fikirləriniz maraqlıdı... Deyilənə görə, sizin də meyliniz var idi...

- Mən Bursaya getməmişdim, onlar Bakıya gəlib mənlə görüşmək istəmişdilər. Mən də bildirdim ki, AFFA ilə müqaviləm var və proses alınmadı.