Millimiz Sloveniyaya qarşı

Bu gün 19 yaşadək futbolçular arasında Avropa çempionatının seçmə mərhələsinin IV qrupunda III turun oyunları keçiriləcək.

Ölkə.Az-ın apasport.az-a istinadən məlumatına görə, Macarıstanda baş tutan qarşılaşmalarda millimiz qrupda sonuncu matçına çıxacaq. Nikolay Adamın rəhbərlik etdiyi komanda Sloveniya yığması ilə qarşılaşacaq. Bu görüşdə futbolçularımız mütləq qalib gəlməlidilər ki, növbəti mərhələyə adlasınlar. Aktivində 1 xal olan və sonuncu pillədə qərarlaşan millimiz sloveniyalıları məğlub edib, digər Macarıstan – Slovakiya matçının nəticəsini gözləməlidi.

Əgər komandamız 3 xal qazanıb, rəqibləri heç-heçə edərsə, onda yığmamız birbaşa elit mərhələyə vəsiqə əldə etmiş olur. Lakin macarlar da qalib gəlsələr, bu zaman millimiz digər III yeri tutan 5 komanda ilə birgə mübarizəni davam etdirmək hüququ qazanacaq. Çünki əsasnaməyə görə hər qrupdan iki ən yaxşı komanda elit mərhələyə adlayır. 13 qrupda III yer sahibi olanlardan ən yaxşı nəticəyə malik 5 kollektiv də vəsiqə qazanır. Bu zaman onların ilk iki yerlə matçlarının nəticələri nəzərə alınacaq. Oyun Bakı vaxtı ilə saat 16:00-da başlayacaq.

Qeyd edək ki, ilk oyunda Macarıstanla 1:1 hesablı heç-heçə edən yığmamız ikinci görüşündə Slovakiyaya uduzub – 1:4.

Ölkə.Az