"Qarabağ"ın məşq bazasından

Ölkə.az "Qarabağ"ın məşq bazasından reportaj hazırlayıb. İlk müsahibiniz Azərbaycan çempionunun hücumçusu Danilo Diaz oldu.

İçəri daxil olanda Diaza "How are you Diaz" deyə xitab etmək istəyərkən, o məni qabaqlayaraq "Nətərisən qaqa?" dedi.

- "Qarabağ"a yeni gəlmisən, təzə şəraitə uyğunlaşa bilirsənmi?

- Düzdür yeni gələndə hər şey mənə qəribə gəlirdi, hər şey fərqli idi. Sözün düzü şəhərlə və klubla tanışlıqdan sonra heç bir problemim qalmadı. Həm insanlar arasında, həm də klub daxilində isti münasibət mənə hər şeyi unutdurdu. Öncələr yollardakı tıxaclar məni qorxudurdu, sonra buna da öyrəşməyi bacardım (gülür). Bir sözlə Bakıda hər şey qaydasındadır və buranı çox sevirəm. Adaptasiya olmağım çox qısa çəkdi.

- Portuqaliya ilə Braziliya bir-birinə yaxın ölkələrdir. Səni rahat ola biləcəyin ölkədən heç tanımadığın Azərbaycana gəlməyə nə vadar etdi?

- Portuqaliyada 2.5 milyon braziliyalı yaşayır. Azərbaycanda isə toplasan bir neçə yüz nəfər yaşayar, ya yox. Orada ünsiyyət qurmaq daha rahatdır, nəinki Azərbaycanda. Braziliyada belə bir deyim var, "ağzında dilin varsa Romaya da gedə bilərsən". Amma sizin ölkədə sadəcə dil cəhətdən problemlərim var və onu da yavaş-yavaş həll edirəm. Amma mənə Azərbaycanda daha rahatdır.

- Nəyə görə rahatdır?

- Orada 1 saat məşq edirdim sonra isə boşluq olurdu. Monoton gün keçirirdim. Burda isə tamam fərqlidir. Günün çoxunu bazada uşaqlarla keçirirəm, şəhəri gəzirəm və s və s.

- "Qarabağ"ın Avropa Liqasındakı debütünü necə dəyərləndirirsən?

- "Qarabağ" ilk dəfə qrupa düşməsinə baxmayaraq çox yaxşı oyun nümayiş etdirir. Düzdür komandama zədə üzündən az kömək etdim, amma "Dnepr" və "İnter"lə oyunda ürəyim onların yanında idi. Hər dörd oyunu yaxşı oyanadığımızı əminliklə deyə bilərəm. Qələbələrə köklənib qrupdan çıxa bilərik. Niyə də olmasın?! Həyatımda gördüyüm ən yaxşı kollektiv buradadır.

- Fransadakı oyuna çıxa biləcəksən?

- Həftəsonu komanda ilə məqşlərə başlayacam. İndi fərdi şəkildə çalışıram. Qabaqcadan danışmaq istəmirəm, amma həmin gün oyuna çıxmağıma ehtimal böyükdür.

- Statistikaya baxsaq, əvvəlki klublarında zəif nəticə göstərərək, az qol vurmusan. "Qarabağ"da isə yeni gəlməyinə baxmayaraq artıq adından söz etdirmisən. Bu nə ilə əlaqədardır?

- Asist etməyi daha çox sevirəm. Qəribəsi odur ki, burda oyunum alındı və ardıcıl qollar vurmağa başladım. Mənim üçün bir anlayış var ki, "məhsuldar ötürmə qola bərabərdir".

- "Qarabağ" qrupdan çıxmağa qadirdir?

- Hər 3 komandanın 4 xalı var. Bu baxımdan nə isə demək çətindir. Amma inanıram ki, yaxşı oynayub, yaxsı nəticə əldə edəcəyik. İnşallah "Sent- Etyen"i orada udacağıq (şoka düşüb Diaz qarışıq hamı gülür) Biz bütün Azərbaycan üçün oynayırıq.

- Komandada kiminlə ailəvi cəhətdən dostluq əlaqələrin var?

- Qara, Maksim, Namiq ilə.

- Artıq "PES 2015" istifadəyə verilib və Reynaldo oynayıb. Bəs sən?

- Yox hələ oynamamışam. Playstation 3 varımdı. Vaxt olduqca onda oynayıram. Əsasən övladıma vaxt ayırıram və evdə oluram.

- Futbolçulardan kiminlə oynayırsan bu oyunu?

- Reynaldo ilə daha çox oynayıram. Oyunun birini 10 manatdan mərc edib oynayıruq. Çox vat o məni udur. Bir dəfə isə Almeydadan 20 manat udmuşam (gülür)