Qara Qarayev: "Meydanda avropalılardan çox qaçırıq, amma lazım olanı edə bilmirik"

Ölkə.az-ın "TOP"lantı layihəsi çərçivəsində "Qarabağ"ın və milli komandamızın futbolçusu Qara Qarayevlə müsahibəni sizə təqdim edirik.

- Qara, başlayaq Milli komandadan. Millimizin Norveç məğlubiyyətini nə ilə əlaqələndirirsən?

- Oyundan sonra da dedim, oyunda ani bir diqqətsizliyimiz oldu. Oyunun taleyini həll edən bir zamanda konsentrasiyamızı itirdik və rəqib bundan istifadə etdi. Düzdür qol vəziyyətləri çox yarada bilmədik, amma az da olsa yarada bildik.

- Niyə start heyətdə meydana çıxmadın? Mahmud Qurbanov Rəşadla Maksimdən başqa "Qarabağ"ın heç bir oyunçusuna şans vermədi...

- Mən özümə yaraşdırmıram məşqçinin haqqında danışmağı. Mən özüm də təcübləndim. Mən elə bir oyunçu deyiləm ki, niyə əsas heyətdə meydana çıxdım ya çıxmadım. Məşqçinin qərarı mənim üçün də gözlənilməz oldu. Ona görə ki, oyundan bir həftə əvvəl "Dnepr"ə qarşı Bakıda oynamışdım. Yenə də məşqçidir, bizə qalan onun fikrinə hörmətlə yanaşmaqdır.

- Foqts getdi. Millidə nə dəyişdi?

- Foqts gedəndən sonra ən azından komandaya milli ruh gəlib. Çünki bütün oyunçular azərbaycanlıdır. Hamı məqsədini bilir. Foqtsun dönəmində bir çox xarici oyunçular gəlirdi. Düzdür yaxşı xarci oyunçu bizə kömək edirsə, bu yaxşı haldır. 5-6 legioner milliyə gəlirsə, o bizim hiss etdiyimizi hiss etmir. Onlar sadəcə kamp xatirinə gəlib, oyunlarını oynayıb gedirlər. Əcnəbilər özünü göstərəndən sonra, xarici bir kluba gedib bir daha Milliyə qayıtmayacaqlar. İndi milli ruh komandada daha da yüksəlib.

- Xorvatiya ilə oyunda biabırçı məğlubiyyət yaşadıq. Həmin oyunda Millinin müdafiəsi demək olar ki, "Qarabağ"ın oyunularından təşkil edilmişdir. Necə olur, o müdafiəçilər "Qarabağ"da az qol buraxırlar, ancaq Millidə bir oyunda 6 qol?

- Rəqib komanda Xorvatiyanın ən yaxşı futbolçularından qurulub. Ayrı ayrılıqda götürəndə xorvatiyalı futbolçular, Real Madriddə, Barselonada oynayırlar. Hər şey taktikadan aslıdır. Oyunçu nə qədər yaxşı oynasa da məşqçinin taktikası səhv olanda komanda 6-0, 10-0 da uduzacaq. Uduzanda fubolçularda günah axtarırlarsa, məşqçidə də axtarmaq lazımdır.

- Xüsusi ilə Milli komanda da oyunçular arxaya daha çox ötürmə edirlər. Bunu nə ilə bağlayırsan?

- İrəlidə oynayan oyunçu yoxdursa, irəli hara gəldi ötürmə etməkdənsə, ən yaxşısı topu arxaya göndərməkdir. Məni də qınayırlar ki, çox arxaya ötürmə edirsən. Arxaya ötürmə etmək daha təhlükəsizdir, nəinki görmədiyin, bilmədiyin yerə ötürmə etmək. Millidə Riçard Almeydaya bənzər futbolçunun olması komandaya daha çox kömək edər. İndiki milli komandamız bir həftənin komandasıdır. Düzdür, Mahmud Qurabanov Berti Foqtsun yerində olsa da futbolçulardan tam fərqli bir şey istəyir. Mahmud Qurbanov 10 gündür bu komandanı yaradıb, ancaq hesab edirəm ki, uduzmağımıza baxmayaraq yaxşı oynamışıq.

- Bir ara söz-söhbət gəzdi ki, Milli komandanın başına Qurban Qurbanov gətiriləcək. Qurbanovun sizi atıb getməsindən qorxmurdunuz?

- Heç kim yaxşı məşqçini itirmək istəməz, biz də onu itirməzdik. Ona görə ki, ölkəmizin əsas komandasına gedəcəkdi. Həmişə istəmişəm ki, Milli komandanı yerli məşqçilər çalışdırsın. Son qərar isə təbii ki, AFFA rəhbərliyinindir.

- "Qarabağ" sanki iki yerə bölünüb. Müdafiə gücünü yerlilər, hücum gücünü legionerlər təşkil edir və Qurban Qurbanov bunu əla sintez edib. Qurban Qurbanov əgər Milli komandaya getsə, Almeydanın və Reynaldonun yerinə kimi oynadacaq?

- Məncə Qurban Qurbanov futbolçulardan başqa şey istəyəcək. Əvvəl oynadıqları kimi yox, başqa cür oynamaqlarını istəyəcək.

- Millimizin evə ümumilikdə futbolumuzun ən böyük çatışmamazlığı qol vuran hücumçu çatışmamazlığıdır. Bunun səbəbi nədədir?

- Statistika da göstərir ki, bizim futbolçular çox az qol vurur. Uşaq futboluna daha çox diqqət ayrılmalıdır. Fubol tək qaçmaqla, fiziki güclə oynanan bir oyun deyil. Fərqli şeylər etməliyik. Avropada bir çox komandalardan çox qaçırıq meydanda, amma lazım olanı edə bilmirik. Uşaqlara futbolu düzgün oynamağa öyrətmək lazımdır. Hücumçu probleminin olması açıq aşkardır. Kiminsə xətrinə dəyəsi bir şey yoxdur. Sizin kimi məni də düşündürür ki, bizdə niyə hücumçu yoxdur?

- Reynaldo ilə Almeydanın milliləşdiriləcəyi ilə bağlı xəbərlər yayıldı. Bu haqda nə deyə bilərsən?

- Bizdə mentalitet çox pisdir. Milliləşən futbolçu 1-2 oyun qol vurmayan kimi ona təziq edirlər. Əgər onlar milliyə gəlsə, həm yaxşı olar, həm də olmasını istəyirik. Ancaq biz onları da başa düşməliyik ki, onlar gələndən sonra bir neçə oyun qol vura bilməsə, onları qazanmaq yerinə itirə də bilərik.

Söhbətin bu yerində "Qarabağ"ın koordinatoru Məhi gəlir.

Məhi deyir: "Axırda FİFA qərar verəcək ki, cərimə meydançasının içərisində millimizin oyunçuları əllə qol vursa sayılacaq. (gülürük). İndi, vəziyyətimiz pisdir ancaq gələcəyimiz gözəl görsənir. Qara meydana çıxandan sonra oyunda hərəkətlilik artdı. Hər şeydən danışın ancaq futboldan danışmayın (gülürük). Məhi Qaraya sual verir, saç stilini dəyişmisən, özünü kimə oxşatmısan?" Qara və biz gülürük...

- Malta da xal qazandı, ancaq biz hələ də sıfır xaldayıq.

- Statistika bizim çox pis vəziyyətdə olduğumuzu göstərir. Jurnalistlər də sual verəndə adam utana-utana cavab verir.

- Hər kəs Foqtstun getməsini, yerinə Qurban Qurbanovun gəlməsini istəyir. Qurban Qurbanov məşqçi karyerasına çox yaxşı başlayıb. Əgər o milli komandaya gəlsə və uğursuzluq olsa, bu onun karyerasına necə təsir edəcək?

- Qurban Qurbanov hələ ki, karyerasının əvvəlindədir. Bu ərəfədə gərək düzgün seçim etsin. Hər bir azərbaycanlı məşqçi istəyər ki, milli komandanın baş məşqçisi olsun, sonu nə olur-olsun. Məncə Qurban Qurbanov düşünməz ki, karyerası pis olar.

- "Qarabağ"dan nə vaxt getməyi düşünürsən? Təklif gəlib?

- Tam səmimi deyim, getmək istəmirəm. Nə vaxt qovsalar onda gedəcəm. (gülürük) "Qarabağ"la müqaviləm var. Müqavilə bağlayanda da Əmrah bəy özü də dedi ki, əgər xaricdən ciddi təklif gəlsə köməklik edəcəyik. Ancaq ölkə daxilində "Qarabağ"dan başqa heç bir kluba keçməyi düşünmürəm. Təkliflər çox gəlib ancaq təklif olaraq da qalıb. Ötən il Ukrayna "Metalluruq"undan təklif gəldi, danışıqlar oldu, gördüm ki, bizə hörmət etmirlər. Deyirlər, yoxlanışa gəl, baxışdan keç sonra müqavilə bağlayaq. Mən bunla razlaşmıram. Mənim gül kimi klubum var, niyə yoxlanışa getməliyəm? Özünə hörmət edən futbolçu belə bir şey etməz. Amma çox istəyirəm xaricdə oynamağı. Türkiyənin ikinci liqasına getməyi heç düşünmürəm. "Qarabağ" daha yaxşıdır. Əmək haqqı arxasınca qaçmamışam. Keçmiş məşqçimiz deyirdi, "azərbaycanlı futbolçular pul üçün oynayır". Ancaq heç vaxt eşitməmişəm ki, avropanın hansısa klubu futbolçumuzu transfer etmək istəsin ancaq əmək haqqına görə razılığa gəlməsinlər. Mənə Almaniyanın ikinci liqasından təklif gəlsə pulu fikirləşmədən gedərəm. Bu yaşımda xarici görməyim karyeram üçün çox yaxşı olar.

- Karyerana cinah müdafiəçisi kimi başladın, ancaq indi mərkəzdə oynayırsan...

- U-17-də mərkəz müdafiəçi də olmuşam. "Qarabağ"da əvvəl cinah müdafiəçisi oldum, ancaq sonradan Qurban müəllim mərkəzdə oynamağı məsləhət gördü. Özümü indiki mövqeyimdə daha yaxşı hiss edirəm.

- Oynadığın mövqe çox kritik bir yerdir. Ancaq boyun hava toplarına çıxmağa o qədər də imkan vermir...

- Mənim mövqeyimdə oynayan, dünyada çox oyunçular saya bilərəm ki, onların da boyu balaca olub. Xavi, Medel və.s. Boy amili önəmli deyil. Əsas olan düzgün oynamaqdır. Meydanda ağıl daha üstündür. Meydanda ağıllı, diqqətli oldunsa boyun, bədənin zəif olmasının fərqi olmur.

- Qarşıdan Fransa "Sent-Etyen"i ilə çətin oyun gəlir. Bu haqda nə deyə bilərsən?

- Açığı Sent-Etyendən əvvəl ölkə çempionatında oyunumuz var. Birinci "Bakı"nı düşünürük.

- Qara, səni futbolçular necə çağırır? Ləqəbin nədir?

- Mənə adətən "Çyornı" deyirlər. Seyidgil, "Dədə" deyir, Vüqar isə "Qaqa" çağırır. (gülürük)

Qaraya gələcək oyunlarda uğur diləyib, başqa müsahibimizi gözləyirik...