Azərbaycansayağı “futbol mədəniyyəti”
Bilet var bilet...
Qarabağın mətbuat xidmətinin rəhbəri Nurlan İbrahimova zəng edib media sektoru üçün bilet xahiş edirəm. Deyir, qurtarıb. Ofisdən tez çıxıb bilet dalınca yollanıram.
20 yanvar metrosundan çıxanda taksi sürücüləri adamın üstünə hücum etdiyi kimi, “Gənclik” metrosundan da çıxanda bilet satanlar adamın üstünə hücum edir.
Bundan öncəki oyunda biletlərin qara bazara dağıldığı ilə bağlı çox yazıldı və əlaqədar qurumlar söz verdi ki, qarşısı alınacaq, ancaq betərin betəri varmış deyirlər...
“Qara bazar”da istənilən sektora bilet tapmaq mümkün idi. Dilim dinc durmur. Satıcıdan soruşuram: “Media sektoruna bilet var?” Deyir: “Əlbəttə var!”.
Satıcı deyir, qardaş, istəsən sənə VİP-də də yer təşkil edərik, hətta xüsusi dəvətnamə də.
Biletlərin qiyməti sektordan aslı olaraq 5 manatdan 10 manatadək dəyişir. 1 manatlıq bilet 5 manat...
Yenə Nurlanın sözü yadıma düşdü “biletlər qurtarıb”. Yəni, biletlər “qara bazar”a çıxarılıb qurtarıb?
Dəvətnamələrin satışı xüsusi ilə diqqətimi çəkdi. Dəvətnamə necə satıla bilər? Adı üstündə dəvətnamə. Klubun görmək istədiyi xüsusi adamlara göndərilməli olduğu halda bu biletlərin “qara bazar”da nə işi var?
Şəxsən mənə çox maraqlıdır, bu biletlər necə “qara bazar”a düşür? Bunları kim satdırır?
Suyun qabağını kəsən “div”
Biletimi alıb stadiona girmək istəyirəm. Birinci polis barrikadası ilə üzləşirəm. Yoxlayıb buraxırlar. Ikincidə yenidən yoxlayırlar. Hər şey təmizdi. Polis deyir: “Əlindəki suya icazə yoxdur!”. Soruşuram: “Səbəb?” Deyir: “Qayda belədir”. Deyirəm: “Bəs susayanda neyniyəcəm?” Deyir: “Rəisdən soruş!”. Nə isə, rəis deyir: “Buraxın keçsin”. Keçirəm. Sektora yaxınlaşıram. Burda da qabağımı “Ərəbzəngi” kimi kəsən başqa bir polis yenə deyir: “Suyu axıra kimi iç, sonra keç!”. “Susamadığım halda necə içim o suyu?”, deyə soruşuram. Polis: “Bilmirəm içməlisən!”. Polislə boğuşmağa heç həvəsim yoxdu, sevimli klubumun oyunu başlayır.
Media sektora baxıram. Media ilə yaxından uzaqdan heç bir əlaqəsi olmayanlar media işçilərindən daha çoxdu. Deyəsiz bacarana baş qurban. Onda bəs bu qanunlar nə üçündür?
UEFA Azərbaycana niyə göz yumur?
UEFA bayrağı altında keçirilən oyunlarda stadionun təhlükəsizliyini klub təşkil etməlidir. Təhlükəsizliyi klubun öz mühafizə xidməti, çatışmamazlıq olanda isə, hansısa mühafizə şirkəti ilə müqavilə bağlanmalı və özəl mühafizəçilər təhlükəsizliyi təmin etməlidirlər. Bizdəki kimi polis yox ki... Polisin yeri stadionun kənarıdır. Ancaq bizdə ön cərgədə daxili qoşunun əsgərləri düzülüb, pilləkənlərdə isə polislər. Sanki mitinq dağıtmağa hazırlaşırlar. Polislərimizdə Maşallah, cinayətkar axtarırmış kimi hər kəsi süzürlər.
UEFA niyə görə bizə göz yumub güzəştə gedir? Niyə öz qaydalarını tapdalayır anlamaq olmur.
Ay sizin o geniş ekranınızı...
Stadionda üç geniş ekran quraşdırılıb. Ancaq ekranda yalnız iki klubun emblemləri görsənir. Bəhanələri var, “texniki problem olur”. Ancaq o bəhanəyə də yer qalmır. Birinci hissə qurtaran kimi geniş ekranda canlı yayım göstərilir. Əgər işləyirsə, niyə oyun gedən zaman göstərmir?
Avropada artıq stadionda yox, hər oturacağın qarşısında kiçik monitorlar quraşdırılıb ki, tamaşaçı birdən qolun təkrarını görmək istəyər, hansısa epuzoda yenidən baxmaq istəyər. Müştəri məmnuniyyəti...
Bilirəm o qədər inkişaf etməmişik. Bəlkə də qorxurlar ki, camaat söküb aparar. Burasını başa düşdük, bəs o boyda geniş ekrana nədir sözünüz, onu da söküb aparacaqlar? Yadıma gəlir, “Mançester Yunayted”lə “Liverpul” qarşılaşırdı. “Liverpul” kapitanı Stiven Cerrard kobudluq etdi. Hakim qərar verməkdə çətinlik çəkirdi. Epizodu yenidən ekrandan izlədi və Cerrarda qırmızı kart göstərdi.
İMARƏTƏ təşəkkürlər
İkinci hissə başlayır. “Qarabağ” müdafiədən oynayır, “Salzburq”un hücumlarının ardı-arası kəsilmir. Məndə də siqaretin... stadion susub...hərdən mənasız yerə dalğalanıb oturur. Yalnız ayaqüstə, ilk fitdən son fitə qədər “İMARƏT” fanklubunun uşaqları ayaq üstə durub, sevimlilərini irəli səsləyirlər.
Fikir vermişəm, Azərbaycanda tərəfdarlar üçün oyun 80 dəqiqədən ibarətdir. Oyunun 80-ci dəqiqəsi son sayılır. Artıq insanlar stadionu tərk etməyə başlayırlar. Oyun bitənədək stadion yarıbayarı boşalır. Bu nə futbol anlayışıdır bu nə tərəfdarlıq anlayışıdır anlamıram.
Yenə başa qayıdırıq
Oyun bitir. Qarabağ qalib gəlir. Və yenə geniş ekran canlı yayıma başlayır. Kimə, nəyə, niyə???
Səxavət MƏMMƏD
Ölkə.az
