İslam Oyunlarının açılışında Türkiyəni təmsil edəcək şəxsin adı məlum oldu

“Ölkə.Az”-ın məlumatına görə, bunu Bakıda səfərdə olan Türkiyənin gənclər naziri Akif Çağatay Kılıc jurnalistlərə açıqlamasında deyib. 

İslam Əməkdaşlıq Təşkilatının tədbirləri ilə əlaqədar Azərbaycanda səfərdə olduğunu vurğulayan Akif Çağatay Kılıc bu gün axşam IV İslam Həmrəylik Oyunlarının açılış mərasiminə də qatılacağını bildirib:

“Ev sahibi olan Azərbaycanlı qardaşlarımız, başda cənab İlham Əliyev olmaqla çox gözəl bir idman oyunlarına imza atıblar. Əminəm ki, oyunlarda iştirak edəcək idmançılar yaxşı nailiyyətlər qazanacaqlar. Bununla da biz çox fərqli və maraqlı idman yarışlarını izləyəcəyik”. 

Türkiyəli nazir qeyd edib ki, V İslam Həmrəylik Oyunları 2021-ci ildə İstanbulda təşkil olunacaq:

“Bu baxımdan da İslam Həmrəyliyi Oyunları Türkiyə üçün böyük əhəmiyyət kəsb edir. Bu oyunların bizim üçün böyük əhəmiyyəti var. Bu çərçivədə indi Bakıda İƏT Gənclər Nazirlərinin toplantısı keçirilib. Toplantı zamanı növbəti görüşün keçiriləcyi yeri müəyyən etdik. Həmçinin, İslam Əməkdaşlıq Təşkilatı ölkələrinin 3 sentyabr Gənclər Günü kimi qeyd edilməsini təsis etdik. İnşallah gələcəkdə bu əməkdaşlıq daha intensiv və geniş aparılacaq”. 

Qeyd edək ki, bu gün axşam Bakıda keçiriləcək IV İslam Həmrəyliyi Oyunlarının açılış mərasimində Türkiyə hökumətini gənclər naziri Akif Çağatay Kılıc təmsil edəcək.

Ramal Hüseynli
Ölkə.Az