“Qarabağ”ın həkimindən Reynaldo açıqlaması

“Qarabağ”ın həkimi Murat Şahinoğlu zədəli futbolçular Reynaldo və Danilo Dias barədə açıqlama verib.

Ölkə.Az “Qarabağ FK”ya istinadən xəbər verir ki,həkim zədəli futbolçular barədə ümidverici sözlər işlədib: “Bakı” ilə görüşdə Reynaldonun diz bağlarında bir az cırılma olmuşdu.Əslində, onun zədəsi çox ciddi ola bilərdi. Xoşbəxtlikdən diz bağı qopmamışdı. Həmin vaxt Reynaldonun 4 həftəyə yaşıl meydanlara qayıdacağını ehtimal edirdik. Artıq iki həftəsi keçib. Çalışırıq onu “İnter”lə görüşə yetişdirək. Lakin bu, çox kiçik ehtimaldır. Qarşılaşmadan bir gün əvvəl son dəfə futbolçunun MRT-sinə baxıb, ona uyğun qərar verəcəyik.

Diasda “mensk” zədəsi var idi. Onu qış fasiləsində əməliyyat etməyi düşünürdük. Lakin “Sent-Etyen”lə Bakıdakı oyunda arxa əzələsində cırılma aşkarlandı. Biz də daha erkən əməliyyat etməli olduq. Dias bir müddət əvvəl məşqlərə başlamışdı. Ancaq köhnə zədəsini yenilədiyi üçün dönüşü yubandı. Futbolçu artıq fərdi hazırlıq keçir. Bir həftəyə kollektivlə məşqlərə başlaya biləcək. Onun “İnter”lə görüşdə iştirak etmə ehtimalı Reynaldodan çoxdur.

Çumbinyo 6 aylıq sıradan çıxmışdı. Artıq 2 ayı geridə qalıb. Fevralın sonlarına qədər sağalmasını ümid edirik. Yəqin ki, gələn ilin mart ayından etibarən komandaya qoşula biləcək".

Qeyd edək ki, “Qarabağ” “İnter”lə dekabrın 11-də qarşılaşacaq.

Ölkə.Az