"Prosineçki böyük uğurlara ac olan mütəxəssisdir"

Azərbaycan millisinin yeni baş məşqçisi Robert Prosineçki oldu. Prosineçkinin təqdimat mərasimində AFFA prezidenti Rövnəq Abdullayev milli komandaya Qurban Qurbanovun yox, Robert Prosineçkinin gətirilməsi səbəbinə aydınlıq gətirib:

"Qurban Qurbanovu “Qarabağ”-dan ayırsaq, ordan da olacaq, burdan da. Qurban millidə 2 oyun uduzsa, hamı istefa qışqıracaq".

Robert Prosineçkinin milli komandanın baş məşqçi təyin edilməsinə və AFFA prezidentinin Qurban Qurbanov haqqında səsləndirdiyi fikrə futbol mütəxəssisi Vaqif Sadıqov Ölkə.Az-da münasibət bildirib.

"Qurban Qurbanov hal-hazırda "Qarabağ"-da çox uğurlu iş görür - böyük uğurlara imza atır. O, Azərbaycan futbolu tarixində yeni tarix yazır . Hesab edirəm ki, belə bir vəziyyətdə onu "Qarabağ"-dan ayırmaq düzgün olmazdı. Robert Prosineçkiyə gəldikdə isə, biz bir şeyi başa düşməliyik ki, o bizim milli komandamızın baş məşqçisidir. Biz hamımız birləşib ona kömək etməliyik. Robert Prosineçki böyük uğurları olmayan, gənc mütəxəsisdir. O, qərar verməzdən öncə Azərbaycan futbolu ilə dərindən tanış olub. AFFA ölçüb biçərək qərar verib. Hamı da gördü ki, tələsik qərar olmayıb. Robert Prosineçki ambisiyası olan bir mütəxəssisdir. O əlindən gələni edəcək ki, Azərbaycan yığması ilə uğur qazansın. Bu gün onun üstünlüyü ondadır ki, o, böyük uğurlara ac olan bir mütəxəssisdir".

Səxavət Məmməd

Ölkə.az