Almaniya - Argentina: İlk yarıda qol vurulmadı
Braziliyada keçirilən futbol üzrə dünya çempionatının finalı başlayıb.
Finalda Almaniya və Argentina yığmaları üz-üzə gələcək. Hər iki komanda hələ mündial başlamamışdan öncə turnirin əsas favoritlərindən sayılırdı.
Almaniya millisi qrup turnirində Portuqaliyanı 4:0, ABŞ-ı 1:0 hesabı ilə məğlub edib, Qana ilə 2:2 hesablı bərabərliyə razılaşıb. 1/8 finalda Əlcəzair millisi ilə üz-üzə gələn Almaniya əlavə olunmuş vaxtda 2:1 hesablı qələbə qazanıb. 1/4 finalda almanlar Fransa millisi üzərində 1:0 hesablı çətin qələbə əldə edib.
Braziliya yığması ilə yarımfinal oyunu isə Bundestimin böyük üstünlüyü ilə yadda qalıb. Almaniya millisi ev sahiblərinə 7:1 hesabı ilə qalib gəlib.
Argentina yığması turnirdə bütün oyunlarını qələbə ilə başa vuran yeganə komandadır. Argentinalılar qrup mərhələsində Bosniya və Hersoqovina üzərində 2:1, İran üzərində 1:0, Nigeriya üzərində 3:2 hesablı qələbə qazanıblar. 1/8 finalda Argentina millisi də əlavə olunmuş vaxtda İsveçrə millisini 1:0 hesablı məğlubiyyətə uğradıb. 1/4 finalda Belçika millisi argentinalılara 1:0 hesabı ilə yenilib. Nəhayət, finala çıxmaq uğrunda görüşdə Argentina penaltilər seriyasında güclü Hollandiya millisini məğlub edib.
Almaniya və Argentina milliləri öz aralarında 20 dəfə görüşüblər. Bu görüşlərdən 9-da Argentina, 6-da Almaniya qalib gəlib. Daha 5 oyun bərabərliklə başa çatıb. Komandalar arasında görüşlərdən 6-sı dünya çempionatları çərçivəsində keçirilib. Argentina və Almaniya 2 dəfə dünya çempionatının finalında üz-üzə gəlib. 1986-cı ildə keçirilən finalda Cənubi Amerika komandası 3:2 hesabı ilə qələbə qazanıb. 1990-cı ildə isə Almaniya bu məğlubiyyətin əvəzini çıxıb. O zaman almanlar 1:0 hesabı ilə qələbə qazanaraq, dünya çempionu olublar. Bu görüş komandalar arasında üçüncü final olacaq.
Komandaların dünya çempionatı çərçivəsində sonuncu oyunu 2010-cu ilə təsadüf edir. Cənubi Afrika Respublikasında keçirilən 1/4 final oyunu zamanı Almaniya Argentinanı 4:0 hesabı ilə məğlub edib.
14 iyul
Final
Almaniya – Argentina - 0:0
Baş hakim: Nikola Ritsolli
Rio-de-Janeyro. «Marakana» stadionu
Almaniya: Noyer, Lam, Xummels, Boatenq, Hövedes, Şvaynştayqer, Kramer, Müller, Kroos, Özil, Kloze.
Argentina: Romero, Sabaleta, Demikelis, Qaray, Roxo, Peres, Maskerano, Bilya, Lavessi, İquain, Messi.
