Azərbaycanda taxıl ehtiyatının həcmi artırılır

Azərbaycanda Dövlət Taxıl Fonduna tədarük edilən taxılın həcmi artırılır.

Nazirlər Kabinetinin verdiyi məlumata görə, “Dövlət Taxıl Fonduna tədarük edilən taxılın həcminin müəyyən edilməsi haqqında” Azərbaycan Respublikası Nazirlər Kabinetinin 2012-ci il 18 sentyabr tarixli 206 nömrəli qərarında dəyişiklik edilib.

Azərbaycan Respublikası Konstitusiyasının 119-cu maddəsinin səkkizinci abzasını rəhbər tutaraq, taxıl istehsalçıları olan qonşu ölkələrdə son dövrlər baş verən iqlim dəyişikliklərinin, həmçinin respublika ərazisində uzun sürən quraqlıq nəticəsində yarana biləcək vəziyyətin əhalinin taxıl məhsulları ilə təminatına birbaşa və ya dolayı təsirinin qarşısının alınması məqsədi ilə Azərbaycan Nazirlər Kabineti qərara alıb ki, 206 nömrəli qərarının 1-ci hissəsində “500 (beş yüz)” sözləri “750 (yeddi yüz əlli)” sözləri ilə əvəz edilsin.

Qeyd edək ki, bir müddət öncə Azərbaycanın kənd təsərrüfatı naziri Heydər Əsədov bildirmişdi ki, gələcəkdə taxıl qıtlığı və qiymət artımından sığortalanmaq üçün dövlət öz taxıl ehtiyatını artırmaq niyyətindədir. Nazir qeyd etmişdi ki, hökumət taxıl ehtiyatının 500 min tondan 700-750 min tona qədər qaldırılması ilə bağlı qərar verəcək. (trend)

Ölkə.Az