Bankda əmanət yerləşdirənlər nələrə diqqət etməli?

"Ölkə.az" xəbər verir ki, müştərilər ilk növbədə bankın maliyyə hesabatlarına baxmalı, bankın səhmdarlarının kim olduğunu bilməlidir (müştəri bilməlidir ki, əmanətini kimə etibar edir). Mətbuatda və sosial şəbəkələrdə bank haqqında yazılanlara fikir verməlidir. Bundan sonra bankın rəsmi internet saytına daxil olub bankın fəaliyyəti ilə yaxından tanış olmalıdır. Bunlardan başqa bankın reklam çağırışlarına inanmamalı və həqiqəti daha dolğun araşdırmalıdır.

Bütün bunları etdikdən sonra vətəndaş müəyyən etməlidir ki, əmanəti tam sığortalanma sisteminə düşür ya yox. Məsələ bundadır ki, Azərbaycanda əmanətlərin tam sığortalanma sistemi 2019-cu ilin martın 1- nə kimi qüvvədədir. Tövsiyyə edirik ki, vətəndaşlarımız banka tam sığortalanmış əmanət qoysunlar. Yəni, illik faiz dərəcəsi milli valyutada 15% - i, xarici valyutada isə 3% -i keçməsin. Bundan sonra isə fikir versinlər ki, müqavilə 2019 –cu ilin martın 1-ni ötməsin. Çünki, bu müddətdən sonra tam sığortalanma sistemi yoxdur.

Hüquqşunas Əkrəm Həsənov “Ölkə.Az”a açıqlamasında bildirib ki, bankda müqavilə bağlanarkən kassa sənədi mütləq alınmalıdır.

Onun sözlərinə görə, banka əmanəti yerləşdirərkən müştəri əmanət müqaviləsi bağlayır və düşünür ki, bu müqavilə kifayət edir:

"Pulunu verdikdən sonra kassa sənədini almır. Mütləq qaydada kassa sənədi alınıb saxlanmalıdır. Çünki, bankla əmanət müqaviləsi bağlanması hələ o banka əmanətin qoyulması demək deyil. Çox zaman vətəndaşlar bunu başa düşmür. Bəzən o sənədlər atılır ya da kassadan tələb edilmir. Vətəndaşın banka əmanət yerləşdirməsini təsdiq edən yeganə sənəd kassa sənədidir. O sənəd mütləq alınmalı və möhürünə diqqət yetirilməlidir ki, möhür həqiqətən də banka aiddir.

Bankların reklamına baxıb əmanət yerləşdirmək qətiyyən düzgün deyil. Dediyimiz meyarlar üzrə seçilən banklar arasında reklamlarına baxmaq lazımdır ki, onlar nə vəd edir. Banklar bəzən tam reallığa uyğun olmayan reklam verirlər. Ən sərfəli şərtləri adətən çətin vəziyyətdə olan banklar təklif edirlər".

Qeyd edək ki, adətən ən sərfəli təkliflər çətin vəziyyətdə olan banklarda olur.

Ölkə.Az