İqtisadçı: "Rusiyanın dollardan imtina etməsi mümkün deyil"

Türkiyə tərəfi Rusiyaya xarici ticarətdə qarşılıqlı hesablaşmalar zamanı milli valyutalardan istifadə etməyi təklif edib. Məlumata görə, bu barədə Rusiyanın İqtisadi İnkişaf Nazirliyinin mətbuat xidmətinin yaydığı açıqlamada bildirilir.

Məlumatda təklifin nazir Aleksey Ulyukayevlə Türkiyənin iqtisadiyyat naziri Nihat Zeybekçi arasında Avstraliyada “20-lərin biznesi” çərçivəsində keçirilən görüş zamanı səsləndirildiyi deyilir.

Məsələ ilə bağlı Ölkə.az-a danışan iqtisadçı ekspert hazırkı vəziyyətdə dollardan imtina etməyin real olmadığını bildirdi.

"Rusiyanın dollardan imtina etməsini real hesab etmirəm. Hətta siyasi hadisələr belə sözügedən ölkənin valyutasından imtina etməyə səbəb ola bilməz. Nəzərə almaq lazımdır ki, Türkiyə üçün dolları Rusiya rublu ilə əvəzləmək heç də arzuolunan deyil. Türkiyə, o cümlədən Rusiya da daha çox Avropa ilə əməkdaşlıq etməyə çalışır. Dollardan imtina edilməsi indiki halda mümkün olmamağı ilə yanaşı, eyni zamanda arzuolunan da deyil. Qeyd edim ki, dünya ehtiyyatının 62%-i dollarla saxlanılır və o son bir il yarımda öz məzənnəsini qoruyub-saxlayıb. Dollar bu gün ən etibarlı və ən risksiz valyuta kimi qiymətləndirilir".

Qeyd edək ki, 2013-cü ildə iki dövlət arasında ticarət dövriyyəsinin həcmi 32.7 milyard dollar təşkil edib. Rusiya Türkiyənin xarici ticarət tərəfdaşları sırasında Avropa Birliyi ölkələrindən sonra ikinci yerdə durur, Türkiyə isə Rusiyanın 8-ci xarici ticarət tərəfdaşıdır.

Fatimə İbrahimova
Ölkə.az