Ekspertlər Online alış-verişdən danışdı

"İstehlakçı təfəkküründə “məhsula toxunmaq” prinsipi ciddi şəkildə qorunur"...

Qonşu ölkələrədən fərqli olaraq Azərbaycanda onlayn (internet) alış-veriş prosesi hələ formalaşma mərhələsindədir. Onlayn alış-verişin təkmilləşməmələri səbəbindən Ölkə.az-a marketinq üzrə ekspert Ramil Cabbarov və Azad İstehlakçılar Birliyinin (AİB) sədri Eyyub Hüseynov danışıb.

Eyyub Hüseynov: “Onlayn alış-veriş ticarət bazarında əsl rəqabətdir. Bəzən online alış-verişin uğursuz olduğu barədə sözlər istifadə olunur, amma əslində bu sahədə ildən-ilə vəziyyət yaxşılaşır".

-Online alış-veriş zamanı məhsulun keyfiyyətli olmasına necə əmin olmaq olar?

"Onlayn alış-veriş edərkən insanlar çox diqqətli olmalıdır. Çünki bəzən mal keyfiyyətsiz olduqda, onu geri qaytarmaq mümkün olmur. Buna görə də, bütün şərtləri dəqiq öyrənmək lazımdır.

Ramil Cabbarov: "Online ticarət sahəsi çağdaş sahələrdəndir və günbəgün təkmilləşməkdədir. Amma real ticarət ilə online ticarət arasında böyük fərq hələ də mövcuddur. İstehlakçı təfəkküründə “məhsula toxunmaq” prinsipi ciddi şəkildə qorunur. Məhz bu səbəbə görə, online ticarət sahəsinə yanaşmada tərəddüt mövcuddur. Tərəddüdü real alış-veriş prosesinə çevirmək üçün isə etimad qazanmaq lazımdır. Günümüzdə online ticarət üzrə 3 böyük şirkət eBay, Amazon və Aliexpress mövcuddur. Uğur qazanmaqlarında əsas səbəblər çeşid müxtəlifliyi və qiymət siyasətinin istehlakçı yönümlü olmasıdır. Online ticarətin ən qlobal problemi isə çatdırılma ilə bağlıdır. Ünvana çatmayan və ya vəd edilən müddətdən gec çatan sifarişlər müştəriləri real alış-verişə istiqamətlənməyə sövq edir. Doğrudur, rahatlıq baxımından üstünlük e-ticarətdə olsa da, müştəri məmnuniyyətində bir addım geridə qalan yenə e-ticarətdir. Ölkəmizdə e-ticarətin istehlakçılar arasında qismən zəif istifadəsi insanların maliyyə savadlılığının lazımi səviyyədə olmamasıdır. Potensial alıcılıq qabiliyyəti olub, lakin bankda hesab kartı olmayan bir çox insan var. Nəzərə alsaq ki, alış-verişin həyata keçirilməsində əsas vasitə məhz bank əməliyyatlarıdır, o zaman qarşıda böyük maneə yaranır. E-ticarətin populyarlaşdırılması üçün isə bütün sektor üzrə mütəşəkkil iş görülməlidir. Məsələn, tekstil sahəsində fəaliyyət göstərən şirkətlər həm mağaza, həm də online rejimdə satış həyata keçirməsi daha məqsədəuyğundur. Nəticə etibarilə müştəri həm vaxtına qənaət edir, həm də şirkət əlavə xərclərdən xilas olur. Azərbaycanda e-ticarətin kütləvi hal almasında və istehlakçılarda alıcılıq qabiliyyətinin yüksəldilməsi taksit kartlarının tətbiqi təqdirəlayiqdir. Amma hazırki vəziyyətdə taksit kartlarının istifadəsində real ticarət üstünlüyünü qorumaqda davam edir".

Qeyd edək ki, yeni qaydalara görə, beynəlxalq poçt göndərişləri vasitəsilə eyni fiziki şəxsin adına 30 gün müddətində ümumi gömrük dəyəri 1000 ABŞ dolları ekvivalenti məbləğindən artıq olmayan gömrük ərazisinə gətirilən qeyri-kommersiya, yaxud qeyri-istehsal xarakterli mallar güzəştli qaydada (gömrük ödənişlərini ödəmədən) gömrük sərhədindən keçirilməklə poçt vasitəsilə gətirilə bilər. Əvvəl isə bu güzəştin məbləği 200 ABŞ dolları ekvivalenti təşkil edirdi.

Fatimə İbrahimova
Ölkə.az