İqtisadçı ekspert: "Rusiya iqtisadiyyatı çox ciddi təhlükə ilə üz-üzədir"

"Qarşıdan hələ daha ciddi sanksiyaların tətbiqi nəzərdə tutulur"

Rusiyanın Ukraynaya hərbi müdaxilə haqda qərarından sonra bu ölkəyə qarşı Avropa ciddi sanksiyalar tətbiq etməyə başlayıb. Sanksiyalar Rusiyada olan iri şirkətlərin səhmlərinin sürətlə ucuzlaşmasına səbəb olub.

Rusiyaya qarşı olan maliyyə sanksiyaları bu ölkənin gələcək taleyine nece təsir edə bilər?

Mövzunu Ölkə.az-a iqtisadçı ekspert Azər Mehdiyev şərh edib.

"Artıq Rusiyaya qarşı tətbiq olunan sanksiyalar öz təsirini göstərir. Rusiya iqtisadiyyatının durumu haqqında artıq kifayət qədər məlumatlar var. Bir tərəfdən dünya neft bazarında başlayan proseslər, bir tərəfdən də artıq Rusiyaya qarşı tətbiq olunan sanksiyalar təsirsiz ötüşmür.

Hələ ilin birinci ayı bitməməyinə baxmayaraq, artıq büdcənin 10% ixtisarı müzakirə olunur. Vəziyyət bu cür davam edərsə, bu ixtisarların davam edəcəyi gözlənilir.
Söhbət yalnız büdcə ixtisarından getmir, eyni zamanda biznes mühitində də ciddi problemlərin olacağı gözlənilir. Xüsusilə də, Avropa ilə əlaqəli biznez sahələrində ciddi uğursuzluqlar özünü göstərəcək.

Ən böyük risk isə özünü neft sektorunda göstərəcək. Ona görə ki, Rusiya özünün neft sektorunun davamlı inkişafı üçün Qərb texnologiyalarına ehtiyyacı var. Bu texnologiyadan məhrum olmaq isə Rusiyanın neft hasilatının artım sahəsində ciddi problemlə üzləşməyə səbəb ola bilər.

Sanksiyalar hələ son deyil. Qarşıdan hələ daha ciddi sanksiyaların tətbiqi nəzərdə tutulur. Qısacası, Rusiya iqtisadiyyatı çox ciddi təhlükə ilə üz-üzədir".

Fatimə İbrahimova
Ölkə.az