"20 ildən çoxdur ki, kənd təsərrüfatı məhsullarına olan ehtiyyacımızı tam ödəyə bilmirik"

"Artıq bizim fermerlərimiz Rusiya üçün məhsul istehsal etməkdən imtina edirlər"

Kənd təsərrüfatının inkişafına dövlət dəstəyinin gücləndirilməsi, yeni çağırışlara uyğun sahə üzrə strateji hədəflərin və institusional dəyişikliklərin müəyyən edilməsi, sahənin keyfiyyətcə yeni mərhələyə keçməsinin təməlini qoyması üçün 2015-ci il Azərbaycan Respublikasında “Kənd təsərrüfatı ili” elan edildi.

Bəs, kənd təsərrüfatını inkişaf etdirmək üçün nələrin edilməsi vacibdir?

Ölkə.az-a danışan ekspert Vahid Məhərrəmov kənd təsərrüfatının sistemli şəkildə inkişaf etdirmək üçün lazım olan siyasət müəyyənləşdirilməsindən danışıb.
"Bu kompaniya xarakteri daşımamalıdır. Yəni kənd təsərrüfatının inkişafı davamlı olmaq üçün kurs müəyyən olunmalıdır. Biz prioritet sahələrimizi, öz resurslarımızı müəyyən etməliyik. Və ən əsası bilməliyik ki, hansı məhsulu xaricə çıxarda bilərik.

Rusiya ilə bizim ticari əlaqələrimiz var. Bu əlaqələr zamanı bizim ixracımız ötən il təxminən 291 mln dollar dəyərində olub. Sonradan isə enmə müşahidə edilib. Artıq bizim fermerlərimiz Rusiya üçün məhsul istehsal etməkdən imtina edirlər. Ona görə ki, Rusiyada rubl dəyərdən düşür və Rusiyada kənd təsərrüfatı məhsullarının satışı nəzarət altında keçirilir. Bu da bizim fermerlərə gəlir gətirmir.

Bütün bunlar kənd təsərrüfatı ilində mütləq nəzərə alınmalıdır. Bizim üçün yeni bazara ehtiyyac yaranır.

- Bu bazar hansı istiqamətdə olmalıdır?

- Avropada olmalıdırsa, biz ÜTT qəbul olmasaq, Avropa ilə ticari əlaqələri yaxşılaşdıra bilməyəcəyik. Ona görə ki, xüsusi tələblər var. Biz Avropa standartına uyğun məhsul istehsal etməliyik.

Hər hansı bir ili kənd təsərrüfatı ili elan etməklə bu problemləri aradan qaldırmaq olmaz, bunlar sözlə həll olunan məsələlər deyil. Bunlar müəyyən qaydalara uyğun, sistemli şəkildə həyata keçirilməlidir. Aqrar sahə mürəkkəb sahədir.

Kənd təsərrüfatının inkişafında lazım olan əsas şərtlər:

1. Bu sahədə çalışan insanların bilgisi artırılmalıdır.

2. Torpaqların keyfiyyətinin deqradasiya prosesinin qarşısı alınmalıdır.

3. Strateji əhəmiyyət kəsb edən seleksiya işləri qaydasına salınmalıdır.

4. Damazlıq işlərinə ciddi nəzarət etmək lazımdır.

Təəssüflər olsun ki, biz 20 ildən çoxdur ki, kənd təsərrüfatı məhsullarına olan ehtiyyacımızı ödəyə bilmirik.

Bu o vaxt mümkün olacaq ki, kənd təsərrüfatı nazirliyində çalışan mütəxxəsislərin hamısı bu sahədə geniş bilgiyə, yüksək ixtisasa sahib olan mütəxxəsislər olacaq.

Qeyd edək ki, Azərbaycan Respublikasının Kənd Təsərrüfatı Nazirliyi Azərbaycan Respublikasının Nazirlər Kabineti ilə birlikdə 2015-ci ilin "Kənd təsərrüfatı ili” elan edilməsinə dair tədbirlər planını bir ay müddətində hazırlanıb Azərbaycan Respublikasının Prezidentinə təqdim ediləcək.

Ölkə.az