Azərbaycanda satışda olan saxta dərmanların həcmi sizi şoka salacaq

Ekspert: "Ölkədə saxta dərmanların dövriyyəsi ən aşağı 35% səviyyəsindədir"

"İstehlakçılar dərman alan zaman Səhiyyə Nazirliyinin qaynar xəttinə müraciət edərək əldə etdikləri dərmanın qeydiyyatdan keçib-keçməməsini müəyyən edə bilərlər"

Azərbaycanda dərman vasitələri üzərində dövlət nəzarətinin gücləndirilməsi nəzərdə tutulub. Bu barədə hətta Milli Məclisin Sosial siyasət komitəsinin bu gün keçirilən iclasında da müzakirələr aparılıb.

Görəsən, hər bir insan üçün əhəmiyyətli olan dərman vasitələri üzərində dövlət nəzarəti hazırda nə vəziyətdədir?

Ölkə.az-ın sualını AİB sədri Eyyub Hüseynov cavablandırıb.

"Dünyada saxta dərmanlar ümumi dərman bazasının 30%-dən 60%-ə qədərdir. Hindistanda saxta dərman istehsalı hətta qanuniləşibdir. Azərbaycanda Hindistan dərmanlarnın payı az olsa da, saxta dərmanların dövriyyəsi ən aşağı 35% səviyyəsindədir.

Bu dünyavi problemdir. Səhiyyə Nazirliyi bu sahədə müəyyən işlər aparır. Hər bir istehlakçı dərman alan zaman Səhiyyə Nazirliyinin qaynar xəttinə müraciət edərək, aldığı dərmanın orjinal olub-olmamasını, qeydiyyatdan keçməsini müəyyən edə bilər".

Qeyd edək ki, təklif olunan dəyişikliklərə əsasən, nəzarət markasının forması, uçotu, istifadəsi və verilmə qaydaları, habelə nəzarət markasının alınmasına görə ödənilən haqqın məbləği müvafiq icra hakimiyyəti orqanı tərəfindən müəyyən ediləcək və həmin vəsaitlər dövlət büdcəsinə köçürüləcəkdir.

Fatimə İbrahimova
Ölkə.az