İqtisadçı ekspert: "İnsanlar kreditləri gəlirləri artan zaman daha çox götürürlər"

"Fiziki şəxslər arasında borcalanların sayında kəskin artım var"

Bu il ötən illə müqayisədə borcalanların sayında 18,61% artım müşahidə olunub. Artım barədə Ölkə.az-a danışan iqtisadçı ekspert Vüqar Bayramov bildirdi ki, kredit şərtləri adiləşəndə insanlar bir neçə bankdan kredit götürməyə can atırlar ki, bu da problemli kreditlərin sayının artmasına səbəb olur.

"Banklardan kredit götürən vətəndaşların sayının artmasının həm müsbət, həm də mənfi tərəfləri var. Belə ki, müsbət tərəfləri ondan ibarətdir ki, adətən insanlar kreditləri gəlirləri artan zaman daha çox götürürlər. Kreditlərə olan təlabat bu zaman daha çox müşahidə edilir. Ancaq kreditə meyilli olmanın mənfi tərəfləri də az deyil. Belə ki, kredit şərtləri adiləşəndə insanlar bir neçə bankdan kredit götürməyə can atırlar və bu problemli kreditlərin sayının artmasına səbəb olur.

Statistik məlumatların təhlili göstərir ki, fiziki şəxslər arasında borcalanların sayı kəskin artır. Ötən ilin göstəricilərini təhlil edəndə məlum olur ki, ümumilikdə fiziki şəxslər tərəfindən kredit reyestrinə daxil olan müraciətlərin sayında artım var. Bu da sevindirici haldır".

Qeyd edək ki, Mərkəzi Bankın məlumatına görə, borcalanlardan 10 min 775 nəfəri hüquqi, 2 mln. 285 min 226-sı fiziki şəxs, 20 min 509 nəfəri sahibkarlıq subyektidir.

Fatimə İbrahimova
Ölkə.az