Martda Bakıda Azərbaycan-Çexiya biznes forumu keçiriləcək

Çexiya Respublikasının Azərbaycandakı səfiri Vitezslav Pivonka İqtisadiyyat və Sənaye Nazirliyində olub.

Görüşdə nazir Şahin Mustafayev səfirə ölkəmizdəki fəaliyyətində uğurlar arzulayıb, Azərbaycan və Çexiya arasında əlaqələrin uğurla inkişaf etdiyini qeyd edib. Nazir ölkələrimiz arasında əməkdaşlığın genişlənməsində dövlət başçılarının, rəsmi nümayəndə heyətlərinin və işgüzar dairələrin qarşılıqlı səfərlərinin önəmini vurğulayıb, bildirib ki, iki ölkə arasında hökumətlərarası komissiya fəaliyyət göstərir, ticarət əlaqələri genişlənir, investisiya qoyuluşu həyata keçirilir.

Şahin Mustafayev Azərbaycan iqtisadiyyatı, ölkəmizin qazandığı uğurlar barədə də məlumat verib. Görüş zamanı nazir Ermənistan istisna olmaqla, regionun digər ölkələri ilə uğurlu əməkdaşlıq aparıldığını qeyd edib, Ermənistan-Azərbaycan, Dağlıq Qarabağ münaqişəsinə dair ölkəmizin ədalətli mövqeyini diqqətə çatdırıb.

Çexiya səfiri səmimi qəbul üçün minnətdarlığını bildirib, ölkələrimiz arasında əlaqələrin inkişafı üçün böyük potensialın olduğunu qeyd edib, ölkəsinin Azərbaycanla qeyri-neft sahəsində əlaqələrin genişləndirilməsində maraqlı olduğunu vurğulayıb.

Görüşdə mart ayında Çexiyanın sənaye və ticarət nazirinin Azərbaycana səfəri və iş adamları arasında biznes forumun keçirilməsi məsələləri müzakirə edilib./Azərtac/

Ölkə.Az