Köhnə qiymətə "zəhərlənəcəyik"

Manatın inflayasiyasının ardından qiyməti qalxan məhsulların başında siqaret gəldi.

Artıq bir həftədən çoxdur ki, qiyməti az qala 50% artaraq siqaret çəkənlərin cibinə çox böyük zərər vurmuşdu. Bu gün artıq xəbər yayıldı ki, siqaretlər köhnə qiymətə satılacaq.

Bununla bağlı Ölkə.az-ın araşdırma qrupu şəhərimizin market və köşklərində siqaretlərin qiymətlərində dəyişiklik olub-olmamasını araşdırmağa çıxdı.

Nəriman Nərimanov metrosunun ətrafındakı köşklərdən birinə yaxınlaşırıq. Satıcıdan siqaretin qiyməti soruşuruq. Satıcı artıq bir neçə saat olar ki, siqaretləri köhnə qiymətə satdıqlarını deyir. Satıcının sözlərinə görə, səhər tezdən onlara tapşırıq veriblər ki, siqaretləri köhnə qiymətə satın.

Bu köşkdən ayrlıb digər köşkə gedirik. Orda da satıcı eyni sözləri deyir.

Aksiz markasız siqaretlərin qiymətində dəyişiklik olacaq?

Aksiz markasız siqaretlər satılan köşkə yaxınlaşırıq. Satıcı yerli siqaretlərin köhnə qiymətə olduğunu bildirir. Aksiz markasız siqaretlərin qiyməti ilə maraqlanırıq. Satıcı bildirir ki, yerli siqaretlərlə bağlı tapşırıq gəlib qiymətləri endirmişik ancaq hələ ki, aksiz markasız siqaretlərlə bağlı heç bir xəbərdarlıq almamışıq.

Köşklərdən uzaqlaşıb böyük marketlərə gedirik.

"Moskva" marketə girib siqaretin qiyməti ilə maraqlanırıq. Market sahibi bildirir ki, bizə də tapşırıq gəlib ki, siqaretin qiymətini endirək ancaq siqaret satan firmalar hələ ki, siqaret gətirməyib. Baha qiymətə aldığımız siqaretləri isə köhnə qiymətə sata bilmərik. Heç kim ziyan etmək istəməz. Siqaret firmalarınnın nümayəndələrini gözləyirik...

"Moskva" marketdən çıxıb "Rahat" marketə giririk. Marketin admistratoru bildirir ki, bizə də qiymətləri endirməyi tapşırıblar, ancaq baha qiymətə aldığımız siqaretləri neyniyəcəyik? Yenidən qiymətləndirməyə gedirik. Siqaret satan firmaları gözləyirik. Onlar gəldikdən sonra yəqin ki, qiymətlərdə dəyişiklik olacaq.

"Life" super marketdəki qiymətlərlə maraqlanırıq. Satıcı qız bildirir ki, biz qiyməti endirməyəcəyik. Ancaq admistrator bildirir ki, ya siqaret satan firmalar baha qimətə satdığı siqaretləri aparsınlar ya da o siqaretlər satılıb qurtarana kimi baha qiymətə satacağıq. Hər şey firmalardan aslıdır...