I Avropa Oyunları ilə bağlı otellər monitorinq olunur

2015-ci ilin 12-28 iyun tarixində Bakıda keçiriləcək I Avropa Oyunları ilə əlaqədar Azərbaycana gələcək xarici turistlərin yerləşəcəyi otellərdə monitorinq aparılır. Bundan başqa, mehmanxana işçiləri üçün də Mingəçevir şəhərində təlimlərə başlanılıb.

Ölkə.Az xəbər verir ki, bunu Mədəniyyət və Turizm Nazirliyi turizm şöbəsinin müdiri Aydın İsmiyev jurnalistlərin suallarına cavab olaraq bildirib.

A.İsmiyev qeyd edib ki, aprelin 6-13-də Bakıda fəaliyyət göstərən mehmanxanaların işçiləri üçün təlimlər keçiriləcək:

“Bununla əlaqədar Türkiyə Mədəniyyət və Turizm Nazirliyinə müraciət etmişik”.

Olimpiya oyunları zamanı ölkəyə gələcək turistlərin yerləşməsinə gəlincə isə A.İsmiyev bildirib ki, son 3-4 ildə artıq Bakıda 4 ulduzlu otellər inşa olunub:

“Onların qiymətləri 70-80 manat təşkil edir. Düşünürəm ki, bu da normal bir rəqəmdir. Hazırda isə Bakıda turistlərin yerləşməsi üçün 12 minə yaxın yer var”.

Ölkə.Az