Serbiya TANAP-a çıxış əldə etmək niyyətindədir

“Bir təchizat mənbəyinə ümid etməməliyik”.

Serbiya Trans-Anadolu Təbii Qaz Boru Xətti Layihəsi (TANAP) vasitəsilə nəql olunacaq Azərbaycan qazına çıxış əldə etməyi planlaşdırır.

Ölkə.Az Oxu.az-a istinadən xəbər verir ki, bu barədə Serbiyanın dağ sənayesi və energetika naziri Aleksandr Antiç bildirib.

“Əsas prioritet – ikitərəfli qaz kəməri yardımı zamanı Serbiya və Bolqariyanın əlaqəsidir. Biz artıq bolqar tərəfdaşlarımızla onun ötürücülük qabiliyyətinə dair danışıqlar keçirmişik. Serbiya bu yaxınlarda tikinti üçün maliyyə mənbəyinin axtarışına başlaya bilər”, - Antiç izah edib.

Nazir qeyd edib ki, Serbiya artıq istənilən energetik layihəyə arxayın olmamalıdır və ya yalnız bir təchizat mənbəyinə ümid etməməlidir.

Məlumat üçün bildirək ki, Türkiyə və Avropa Birliyi ölkələrinin enerji təhlükəsizliyinin təmin edilməsi və təchizatın diversifikasiyası baxımından böyük önəm daşıyan TANAP çərçivəsində qonşu ölkəyə ilk qaz nəqlinə 2018-ci ildə başlanılması planlaşdırılır. Başlanğıcda illik 16 mlrd. kubmetr təşkil edəcək nəql həcminin mərhələli surətdə əvvəlcə 24 mlrd. kubmetrə, sonra 31 mlrd. kubmetrə yüksəldilməsi nəzərdə tutulur.

1850 kilometrlik TANAP xətti 2020-ci ilin əvvəlindən etibarən Trans-Adriatik Təbii Qaz Boru Xəttinə (TAP) bağlanaraq, Cənubi Qafqaz Boru Xətti vasitəsilə alacağı təbii qazı Yunanıstan, Albaniya və İtaliya üzərindən Avropaya çatdıracaq.

TANAP 10-11 mlrd. dollar dəyərində qiymətləndirilir.

Layihədə payçılar arasında səhmlər belə müəyyənləşdirilib: “Cənub Qaz Dəhlizi” şirkəti - 58%, BOTAŞ - 30%, BP - 12%.

Ölkə.Az