Kamerunlular Azərbaycanın gömrük təcrübəsini öyrənir

Kamerun və Azərbaycan arasında diplomatik münasibətlər olsa da, indiyədək iqtisadi və digər sahələrdə ikitərəfli əlaqələr formalaşmayıb.

Ölkə.Az xəbər verir ki, bu sözləri Dövlət Gömrük Komitəsinin sədri Aydın Əliyev Kamerun Gömrük İdarəsinin baş direktoru LiLikeng Minette Mendomo Avoumvele Libom ilə görüşü zamanı bildirib.

Komitə sədri gömrük orqanları vasitəsilə yaradılan bu ilk əməkdaşlıq əlaqələrinin hər iki ölkənin digər sahələrdə də qarşılıqlı münasibətlərinin yaradılması işinə böyük töhfə verəcəyinə əmin olduğunu vurğulayıb.

Azərbaycanın bütün dünya dövlətləri, o cümlədən, Kamerun ilə bütün sahələrdə sıx əməkdaşlıq əlaqələri yaratmaqda maraqlı olduğunu qonaqların nəzərinə çatdıran Komitə sədri bunun üçün hər iki ölkənin böyük potensialı olduğunu və bu imkandan maksimum yararlanmağın vacibliyini bildirib.

Kamerun Gömrük İdarəsinin baş direktoru xanım LiLikeng Minette Mendomo Avoumvele Libom Azərbaycan və Kamerun gömrük orqanları arasında dostluq və əməkdaşlığın gücləndirilməsinə göstərilən diqqət və yardımı yüksək qiymətləndirib. Qonaq Azərbaycan Gömrük Xidmətinin əldə etdiyi uğurların Kamerun tərəfindən maraqla qarşılandığını, o cümlədən, azərbaycanlı həmkarlarının təcrübəsini öyrənməkdə və sıx əməkdaşlıqda maraqlı olduqlarını vurğulayıb.

Qeyd edək ki, Kamerun nümayəndə heyətinin Azərbaycana səfəri aprelin 11-dək davam edəcək.

Ölkə.Az