Azərbaycanla Belçika arasında ticarət dövriyyəsi artıb

“İş adamları arasında əlaqələrin genişlənməsi vacibdir”.

2014-cü ildə Azərbaycan ilə Belçika arasında ticarət dövriyyəsi əvvəlki illərlə müqayisədə 30%, bu ilin birinci rübündə isə 66% artıb.

Bu barədə İqtisadiyyat və Sənaye nazirinin müavini Sahil Babayev aprelin 30-da keçiirlən Azərbaycan-Belçika biznes formunda səsləndirib.

Nazir müavini iki ölkə arasında iqtisadi sahədə 3 sənədin imzalandığını, Azərbaycanda ticarət, tikinti, xidmət, nəqliyyat, rabitə, sənaye və s. sahələrdə 17 Belçika kapitallı şirkətin fəaliyyət göstərdiyini bildirib.

Öz növbəsində, Belçikanın xarici ticarət üzrə dövlət katibi Pieter De Krem ölkəsinin Azərbaycanla iqtisadi-ticarət əlaqələrinin genişləndirilməsində maraqlı olduğunu vurğulayıb.

“Bu günkü biznes forumda Belçikanın 60-a yaxın aparıcı şirkətlə təmsil olunması Azərbaycana, Azərbaycan iqtisadiyyatına artan marağın göstəricisidir”-deyə, Pieter De Krem bildirib.

Dövlət katibi ölkəsinin iqtisadiyyatı barədə məlumat verib, iş adamları arasında əlaqələrin genişləndirilməsinin vacibliyini qeyd edib.

Qeyd edək ki, biznes formunda rəsmi şəxslərlə yanaşı, hər iki tərəfdən kənd təsərrüfatı və qida sənayesi, İKT, sənaye, konsaltinq, logistika və digər sahələrdə fəaliyyət göstərən 120-dən çox şirkətin nümayəndəsi iştirak edib. (oxu.az)

Ölkə.Az