Natiq Əliyev: 80 dollar neft üçün münasib qiymətdir

Neftin dünya qiymətləri tezliklə bir barelə görə 80 dollara çatacaq və bu qiymət bazarın bütün iştirakçıları üçün məqbuldur. 

Bu barədə Almaniyanın “Sputnik” nəşrinə Azərbaycanın energetika naziri Natiq Əliyev bildirib. 

“Hesab edirəm ki, bu qiymət neft hasil edən bütün ölkələr üçün münasibdir”, - Əliyev deyib. 

Onun sözlərinə görə, xam neft istehsalçıları kəşfiyyat və qazma işlərinin yüksək dəyərindən, həmçinin ətraf mühitin mühafizəsi və elmi araşdırmalara olan xərclərdən ziyan görmüş öz büdcələrini saxlamaq üçün yaxın zamanlarda neft emalını azaltmalı olacaqlar. 

“Xammalın istehsalının azaldılması üçün digər motiv bu sahədə ümumi cari istehsalın aşağı düşməsidir”, - o əlavə edib. 

Qeyd edək ki, neftin dünya qiymətləri 2014-cü ilin yayından etibarən təxminən 50% aşağı düşüb. Bu da öz növbəsində Azərbaycan, İran və Rusiya da daxil olmaqla enerji resurslarının ixracından asılı olan ölkələrin iqtisadiyyatlarına ziyan vurub.

2014-cü ilin noyabrında OPEK neft emalını azaltmamaq barədə qərar qəbul edib ki, bu da qiymətlərin daha da aşağı düşməsinə səbəb olub.

Brent markalı xam neftin hazırkı qiyməti bir barelə görə təxminən 68 dollar təşkil edir.oxu.az

Ölkə.Az