Oscar statues
Mətn ölçüsü:
  • 100%

“Kristal Abşeron”dakı faciə: ölüm işinin zərərini kim ödəyəcək?

Ötən günlərdə Bakının Səbail rayonunda çoxmərtəbəli binanın tikintisi zamanı ərazidə yuxarı mərtəbəyə yük qaldıran qurğunun trosunun qırılması nəticəsində bir nəfər hadisə yerində ölmüş, bir nəfər isə müxtəlif dərəcəli xəsarətlər almışdı.

Səbail Rayon Prokurorluğu hadisə ilə bağlı cinayət işi başladıldığını və hadisənin “Kristal Abşeron” MTK-nın çoxmərtəbəli yaşayış binasının tikintisi zamanı baş verdiyini açıqlamışdı. Prokurorluğun ilkin araşdırmalarına görə, hadisə Səbail rayonu, Q.Abbasov küçəsi 32/34 ünvanında yerləşən çoxmərtəbəli yaşayış binasının tikintisi zamanı qaldırıcı qurğunun yerə düşməsi nəticəsində 1984-cü il təvəllüdlü Nəriman Salahov vəfat edib, 1987-ci il təvəllüdlü Aruz Əhmədov isə müxtəlif dərəcəli bədən xəsarətləri alıb.

Hadisə zamanı vəfat edən ustanın ailəsinə, digər ustanın isə özünə dəyən ziyanın kim tərəfindən qarşılanacağı isə sual doğurur. 

Sığorta sahəsi üzrə ekspert İlkin İbrahimov “Ölkə.az”a açıqlamasında bildirdi ki, burada 2 növ sığorta olmalıdır: 

“Qarşı tərəfə dəyən ziyan üçün yəni, yük qaldıran qurğunun aşacağı və ya hərəkət edərkən digər əmlaklara zərər vuracağı halda “Daşınmaz əmlakın istismarı ilə bağlı mülki məsuliyyətin icbari sığortası” üzrə sığorta edilməlidir. Bununla bərabər hər bir işçinin “İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta”sı olmalıdır. 

Ekspert qeyd edib ki, hər iki sığorta məcburidir və edilmədiyi halda məsuliyyət yaradır.

Mövcud sığortaların edilib-edilməməsi ilə bağlı “Kristal Abşeron” MTK ilə əlaqə saxladıq. Şirkətin kadrlar şöbəsi əvvəlcə hadisə zamanı vəfat edən və xəsarət alan şəxslərin “Kristal Abşeron”un işçiləri olmadığını desə də, daha sonra ətraflı məlumat verməkdən imtina etdi.

Şirkətin mətbuat şöbəsindən isə zəngimizə hər hansı cavab verilmədi.

İ.İbrahimov isə bildirdi ki, bu sığorta növləri icbaridir və həyat sığortasına nəzarəti Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti edir.

Dövlət Əmək Müfəttişliyi Xidmətindən isə “Ölkə.az”ın sorğusuna cavab olaraq bildirildi ki, hazırda Dövlət Əmək Müfəttişliyi Xidmətində hər iki hadisə ilə bağlı istehsalatda baş verən bədbəxt hadisələrin araşdırılması qaydalarına uyğun olaraq araşdırma başlanılıb. Qurum hadisənin istehsalatla bağlı olub-olmaması araşdırır. Araşdırma yekunlaşdıqdan sonra əlavə məlumat veriləcək.