Azərbaycan Aİ-nin "Təhlükəsiz internet" layihəsinə qoşulmaq istəyir

Azərbaycan Avropa İttifaqının (Aİ) uşaq və yeniyetmələrin internetin mənfi təsirindən qorunmasını təmin etməyə hesablanmış layihələrə qoşulmaq niyyətindədir.

Bunu rabitə və yüksək texnologiyalar naziri Əli Abbasov Beynəlxalq Telekommunikasiya İttifaqının (ITU) yaradılmasının 150 illiyinə həsr edilmiş İnformasiya təhlükəsizliyinin multidissiplinar problemləri üzrə II Respublika elmi-praktik konfransında deyib.

Onun sözlərinə görə, yayda Aİ-nin və rəqəmsal iqtisadiyyat üzrə "Şərq Tərəfdaşlığı" proqramının iştirakçı ölkələrinin İKT sahəsinin nazirlərinin görüşü gözlənilir: "Azərbaycanın Aİ-nin layihələrində iştirakı məsələsi bu görüşün yekunu üzrə qəbul edilməsi gözlənilən bəyannaməyə daxil edilə bilər. Azərbaycanın Aİ-nin layihələrində iştirakı məsələsi üzrə təklif Azərbaycan Milli Elmlər Akademiyası tərəfindən hazırlanacaq".

AMEA-nın akademik-katibi Rasim Əliquliyev çıxışında qeyd edib ki, Aİ-də uşaqların virtual mühitin mənfi təsirindən qorunmasına yönəldilmiş çoxlu xüsusi proqram var, lakin Azərbaycan Avropa İttifaqının üzvü olmadığından həmn proqramlarda iştirak edə bilməz: "Azərbaycanın Aİ-nin "Şərq Tərəfdaşlığı" proqramında iştirakı ölkəyə Avropa İttifaqının "Təhlükəsiz internet" layihəsinə qatılmağa imkan verə bilərdi".trend

Ölkə.Az