Nəqliyyat Nazirliyində I Avropa Oyunları ilə bağlı müşavirə keçirildi

Nəqliyyat Nazirliyində I Avropa Oyunları ilə bağlı müşavirə keçirilib.

Bu barədə Ölkə.Az-a nazirlikdən bildirilib.

Nazirliyin məlumatına görə, nəqliyyat nazirinin müavini Musa Pənahovun sədrliyi ilə keçirilən müşavirədə Daxili İşlər Nazirliyi, Dövlət Yol Polisi İdarəsi, Bakı Şəhər İcra Hakimiyyəti, Bakı Metropoliteni, Bakı-2015 Avropa Oyunları Əməliyyat Komitəsinin Nəqliyyat Departamenti və Nəqliyyat Nazirliyinin aidiyyəti struktur bölmələri və tabeli qurumları iştirak edib.

Musa Pənahov I Avropa Oyunlarına hazırlıq dövründə nəqliyyat-yol kompleksi üzrə görülən işlər, Nəqliyyat Nazirliyi üzrə müəyyən edilmiş vəzifə və funksiyaların həyata keçirilməsi istiqamətində nazirliyin struktur bölmələri və tabeli qurumları tərəfindən həyata keçirilən tədbirlər barədə məlumat verib.

Müşavirədə, həmçinin, I Avropa Oyunları ərəfəsində digər müvafiq dövlət qurumlarının gördüyü işlərdən danışılıb, görülmüş konkret işlər barədə aidiyyəti üzrə hesabatlar dinlənilib.

Bundan başqa, müşavirədə son hazırlıq işləri və oyunlar müddətində nəqliyyatın işinin təşkili, daşımaların təhlükəsizliyinin təmin edilməsi, nəqliyyat əməliyyatlarının koordinasiyası və digər təşkilati məsələlər müzakirə edilib.

Ölkə.Az