Deputat: ““Şimal-Cənub” dəhlizi Azərbaycanın strateji mövqeyinin güclənməsi baxımından əhəmiyyətlidir”
“Şimal-Cənub” Nəqliyyat Dəhlizinin reallaşması Azərbaycanın strateji mövqeyinin güclənməsi, xüsusən də, Zəngəzur dəhlizinin istifadə veriləcəyi kontekstindən bölgəni əhatə edən beynəlxalq nəqliyyat layihələri baxımından əhəmiyyətlidir.
Bunu “Ölkə.Az”a açıqlamasında Milli Məclisin İqtisadi siaysət, sənaye və sahibkarlıq komitəsinin üzvü Vüqar Bayramov deyib.
Onun sözlərinə görə, Şimal-Cənub dəhlizi vasitəsi ilə Finlandiyanın Helsinki şəhərindən Hindistanın Nava Şeva limanına ilk konteyner blok qatarı yola salınılıb. “Dəhliz ilə ilk konteyner qatarı Rusiya, Azərbaycan və İran ərazisindən keçməklə Hindistana çatdırılacaq. Bu o deməkdir ki, artıq bütün tərəflər bu dəhlizin tez bir zamanda reallaşmasında maraqlıdır”- o qeyd edib.
Deputat əlavə edib ki, Şüveyş kanalında son baş verən qəzadan sonra isə Şimal-Cənub dəhlizinin əhəmiyyəti daha da yüksəlib: “Belə ki, nəinki region ölkələri, həmçinin inkişaf etmiş dövlətlər layihəyə regionda əsas alternativ nəqliyyat dəhlizi kimi yanaşırlar. Bu isə dəhlizin iqtisadi səmərəliliyini artırmaqla yanaşı, strateji əhəmiyyətini də yüksəldib.
Rusiyadan Hindistana qədər uzanan nəqliyyat dəhlizi region üzrə beynəlxalq yükdaşımaların həcminə xüsusi təsir göstərəcək. Azərbaycan həm investisiya, həm infrasturuktur baxımından layihənin reallaşmasına dəstək verib. Layihənin həyata keçməsi Azərbaycan üçün beynəlxalq yükdaşımaların həcminin artırılması baxımından da vacibdir. Beynəlxalq daşımalar ölkəmizin qeyri-neft sektorunun əsas istiqamətlərindən biridir. Güman edilir ki, "Şimal-Cənub" Nəqliyyat Dəhlizinin reallaşması beynəlxalq yükdaşımanın həcminin artmasına və qeyri-neft gəlirlərimizin artmasına imkan verəcək.
Eyni zamanda, layihə Azərbaycanın strateji mövqeyinin güclənməsi baxımından da əhəmiyyətlidir. Xüsusən də, Zəngəzur dəhlizinin istifadə veriləcəyi kontekstindən bölgəni əhatə edən beynəlxalq nəqliyyat layihələrinin əhəmiyyəti yüksəlməkdədir”.
Qeyd edək ki, 2000-ci ildə İran, Rusiya və Hindistan tərəfindən “Beynəlxalq Şimal-Cənub Nəqliyyat Dəhlizi” layihəsi yaradılıb. 2005-ci ildən etibarən layihənin önəmli parçasına çevrilən Azərbaycan aktiv şəkildə dəhlizin reallaşmasına dəstək olub.
Mürtəza
Ölkə.Az
