“Tesla” qəribə problemlə üzləşdi

İlon Maska məxsus elektrikli avtomobil şirkəti “Tesla” maraqlı problemlə qarşılaşıb.

“Ölkə.az” xarici KİV-ə istinadən xəbər verir ki, elektrikli lüks modelləri ilə satış rekordları qıran “Tesla”nın avtomobillərini siçanlar yeməyə başlayıb.

Belə ki, avtomobillərin ABŞ-da yaşayan bir sıra istifadəçiləri xüsusilə park edilmiş nəqliyyat vasitələrinin bamperləri, izolyasiya materialları və kabellərində siçan izlərinə rast gəldiklərini bildiriblər.

Avtomobil sahiblərindən biri kondisioner problemi səbəbindən avtoservisə getdikdə maraqlı bir hal ilə qarşılaşdığını və saxlanc qutusundan cansız bir siçanın çıxdığını söyləyib. 

Buna səbəb isə “Tesla” elektromobillərində izolyasiya kabellərinin soya ilə hazırlanması və bununla da, siçovulların diqqətini çəkməsi olub.

Məsələ ilə bağlı “Tesla”nın xidmət məsləhətçisi Xose Solis açıqlamasında bildirib ki, bir çox avtomobil istehsalçıları daha ucuz və ətraf mühit üçün daha yaxşı olduğundan nəqliyyat vasitələrinin tel izolyasiyası üçün soya yağından istifadə edir. Lakin bu səbəbdən ortaya çıxan xərcin “Tesla” tərəfindən qarşılamayacağı qeyd olunub.