Bankların vəziyyəti: Qazanc azalıb, 16 şöbə bağlanıb, 600-ə yaxın işçi götürülüb

Azərbaycanda bank sektorunun 2021-ci il 30 iyun tarixinə maliyyə vəziyyəti məlum olub.

“Ölkə.az”ın məlumatına görə, bank sektoru cari ilin ilk yarısını 366,3 mln manat xalis mənfəətlə başa vurub Bu isə ötən ilin iyun göstəricisi ilə müqayisədə 1,5% az, cari ilin may göstəricisi ilə müqayisədə 34,1% çoxdur.

Cari ilin iyunun 30-na bank sektorunun cəmi aktivləri 33 069,9 mln manat təşkil edib ki, bu da illik müqayisədə 8,3%, aylıq müqayisədə 2,2% azdır. Banklar tərəfindən müştərilərə verilmiş kreditlərin həcmi isə 6 ay ərzində artım nümayiş etdirib. Belə ki, bank sektorunun kredit portfeli ötən ilin ilk yarısı ilə müqayisədə 4,9%, may ayı ilə müqayisədə 1,1% artaraq 14 856,9 mln manat təşkil edib.

Banklarda yerləşdirilən depozitlərin həcmi 22 125 mln manata qalxıb ki, bu da 2020-ci ilin ilk yarımili ilə müqayisədə 2,7 mlrd manat və ya 14,2% artım deməkdir. Cəmi öhdəliklərin həcmi isə illik müqayisədə 8,8% artaraq 28 220,1 mln manat olub.

Bank sektorunun cəmi kapitalı da illik müqayisədə 5,4% artaraq iyunun 30-na 4 849,8 mln manat təşkil edib.

Bank filiallarının sayı illik müqayisədə 25 ədəd artıb və ilin ilk yarısında 465-ə çatıb, bank şöbələrinin sayı isə 16 ədəd azalaraq 101-ə enib. Bank ATM-lərinin sayında da artım müşahidə olunub. Belə ki, ötən ilin birinci yarımıilində 2569 ədəd olan bankomatlar 235 ədəd artaraq bu ilin birinci yarısında 2804 ədəd olub.

Bank sektorunda çalışanların sayında da ciddi artım müşahidə olunur. Ötən ilin eyni dövrü ilə müqayisədə bank işçilərinin sayı 593 nəfər və ya 3,2% artaraq 18 993 nəfər təşkil edib.

Könül

Ölkə.az