Azərbaycanda torpaqdan səmərəsiz istifadəyə görə cəzalandıracaqlar
Azərbaycan prezidenti İlham Əliyev İnzibati Xətalar Məcəlləsi və Cinayət Məcəlləsinə torpaq sahələrindən səmərəsiz istifadəyə görə cəzanın sərtləşdirilməsini nəzərdə tutan dəyişikliklərin edilməsinə dair təklifləri Milli Məclisə göndərib, Ölkə.Az İnterfaks-a istinadən xəbər verir.
Bazar ertəsi parlamentin Aqrar Siyasət Komitəsi dövlət başçısının təklif etdiyi və hər iki məcəlləyə torpaq sahəsi üzərində mülkiyyət, istifadə və icarə hüquqlarının pozulmasına görə sanksiyaların tətbiqini nəzərdə tutan dəyişikliklərə baxıb.
“Qeyd edilən dəyişikliklərin edilməsi vaxtında atılan addımdır, çünki son illər torpağın istifadəsi ilə bağlı pozuntuların sayı artıb. Paytaxtın Binəqədi rayonunda baş verən yanğınla əlaqədar son çıxışında Azərbaycan prezidenti bir çox məmurların qanun pozuntularına yol verdiyini açıq şəkildə qeyd edib”, - deyə Aqrar Siyasət Komitəsinin sədri Eldar İbrahimov bildirib.
Onun sözlərinə görə, ölkəni məqsədyönlü şəkildə istifadə olunmayan torpaq sahələrinin hasara alınması “epidemiyası” bürüyüb.
“Hökumətin fövqəladə iclasında prezident villaların qanunsuz tikintisi ilə bağlı məsələ qaldırıb. Bu villaların sahibləri isə əmlakların onların məxsus olmasını boyunlarına almaq istəmirlər”, - deyə komitə sədri bildirib.
E.İbrahimov qeyd edib ki, Azərbaycan ərazisində sahibləri tərəfindən hündür hasarlar arxasında gizlədilən çoxlu sayda torpaq sahəsi var. Beləliklə, minlərlə hektar torpaq məqsədyönlü şəkildə istifadə olunmur.
“Sovet qanunvericiliyində torpağın səmərəsiz istifadəsi, işğalı, icarə hüququnun pozulmasına görə cinayət məsuliyyəti nəzərdə tutulurdu. Bu istiqamətdə Azərbaycanda göz yumma tətbiq edilib, bu isə çoxlu sayda qanun pozuntularına gətirib çıxarıb. Buna görə də sanksiyaların sərtləşdirilməsini və pozucuların cinayət məsuliyyətinə cəlb olunmasını çox düzgün hesab edirəm”, - deyə o vurğulayıb.
“Ölkənin müxtəlif regionlarında, xüsusilə Abşeron yarımadasında hələ də torpaq sahələrinin qanunsuz tutulması faktları mövcuddur. Torpaqların səmərəsiz istifadəsi məhsul yığımının həcminin azalmasına səbəb olub”, - deyə komitənin üzvü Eldar Quliyev bildirib.
O, respublikada torpaq sahələrinin səmərəli istifadəsinə dair monitorinq yoxlamalarının həyata keçirilməsini təklif edib.
“Bu gün istifadəçilərin torpaq sahələrinin icarəsinə görə 200-300 manat ödəməsi təcrübəsi tətbiq edilir. Belə bir yenilik təklif edirəm ki, torpağın icarə haqqı məhsulun bir hissəsi ilə ödənilsin - taxıl, digər bitkilərlə, əgər torpaq sahələri heyvandarlığın inkişafı məqsədilə istifadə olunursa, o zaman ət məhsulu ilə ödənilsin”, - deyə deputat bildirib.
Deputat Novruzəli Aslanov da ölkənin regionlarında torpaq sahələrinin hasara alınması faktlarının mövcud olduğunu qeyd edib.
“Bu xəstəlikdən qurtulmaq lazımdır. Xaricdə torpaq sahələri hündür hasara alınmır. Bizdə isə torpaq sahəsini alan kimi dərhal çoxmetrlik hasarlar inşa edirlər və hektarlarla torpaq təyinatı üzrə istifadə olunmur”, - deyə o, torpaqların səmərəsiz istifadəsinə görə sanksiyaların sərtləşdirilməsi ideyasını dəstəkləyib.
Öz növbəsində parlament komitəsinin üzvü Arif Əşrəfov diqqəti Nabranda torpaq sahələrinin turizm obyektləri kimi səmərəsiz istifadə olunmasına yönəldib. O, həmçinin respublika ərazisində monitorinqin aparılmasının zərurliyini də qeyd edib.
Ölkə.Az
