Kənd təsərrüfatı yarmarkalarına ehtiyac varmı?

"Kənd təsərrüfatı məhsullarının satış yarmarkaları təkcə şənbə və bazar günləri təşkil olunmalı deyil. Fermlerlərə şərait yaradılmalıdır ki, onlar istehsal etdiyi məhsulu bazarlara rahat şəkildə çıxarıb, istehlakçıya təqdim edə bilsinlər".

Bu fikirləri kənd təsərrüfatı üzrə ekspert Vahid Məhərrəmov Ölkə.az-a açıqlamasında deyib. O bildirib ki, fermerlərin istehsal etdikləri məhsulu bazarlara çıxarmasında böyük çətinliklər var:

"Yarmarkaları təşkil edən Kənd Təsərrüfatı Nazirliyinin məqsədi təkcə qiymətləri aşağı salmaq olmamalıdır. Nazirlik kiçik təsərrüfatlarda çalışan fermerlər üçün bazara çıxış imkanlarını asanlaşdırmalıdır. Bizim fermerler istehsal etdiyi məhsulu bazarlara çıxarmaqda çətinlik çəkirlər. Bazarlar xüsusi güclərin əlində olduğu səbəbindən fermerler üçün bazarlar əlçatan deyil".
V.Məhərrəmovun sözlərinə görə, Kənd Təsərrüfatı Məhsullarının Satış Yarmarkaları təkcə şənbə və bazar günləri işləməməlidir:

"Ümumiyyətlə düşünürəm ki, bu yarmarkalara ehtiyac yoxdur. Kiçik və böyük şəhərlərədə mövcud olan bazarlarda imkan yaratmaq lazımdır ki, kənd təsərrüfatı istehsalı ilə məşğul olan kiçik və orta sahibkarlar məhsulu həmin bazarlara rahat şəkildə çıxara bilsinlər.
Maksimum imkan vermək lazımdır ki, istehsal olunan məhsul qısa müddətdə bazara çıxarılaraq satılsın. Çünki fermerler elə böyük həcmdə məhsul istahsal etmirlər ki, onun gəlirindən hətta soyuducu anbarlara da əlavə vəsait xərcləsinlər".

Məlumat üçün bildirək ki, həftənin şənbə və bazar günləri paytaxtın müxtəlif məntəqələrində təşkil olunan kənd təsərrüfatı yarmarkaları yığışdırılıb.

Həsən ELBRUSOĞLU
Ölkə.az