“Bank BTB”də 13,8 milyon manat YIĞILMIŞ ZƏRƏR
“Bank BTB” ASC 2021-ci ilin üçüncü rübü üzrə maliyyə hesabatını açıqlayıb.
“Ölkə.Az”ın məlumatına görə, cari ilin sentyabrın 30-na bankın cəmi aktivləri 363,503 mln manat təşkil edib. Bu isə ötən ilin eyni dövrü ilə müqayisədə 2,2% çoxdur.
Müştərilərə verilmiş xalis kreditlərin həcmi illik müqayisədə 15,3% artaraq 246,936 mln manat təşkil edib.
Ötən ilin eyni dövrü ilə müqayisədə bankın tələbli depozitlərin həcmi 2,2 dəfə azalaraq 16,949 mln manata, müddətli depozitlərini isə 42% artaraq 127,832 mln manata çatıb. Bankın cəmi öhdəlikləri isə 5,7% artaraq cari ilin sentyabrın 30-a 307,823 mln manat təşkil edib.
“Bank BTB”nin cəmi kapitalı isə illik müqayisədə 9 mln manat və ya 14% azalaraq 55,680 mln manata enib.
Cari ilin ilk doqquz ayında bankın xalis faiz gəlirləri 7,370 mln manat, xalis qeyri-faiz xərcləri isə 7,307 mln manat təşkil edib. Əməliyyat mənfəəti 62 min manat olan bank aktivlər üzrə mümkün zərərlərin ödənilməsi üçün xüsusi ehtiyatın yaradılmasına ayırmalarını 1,111 mln manat azaldıb. Mənfəətindən vergi ödəməyən bank 2021-ci ilin ilk doqquz ayını 1,174 mln manat xalis mənfəətlə başa vurub.
Bankın 1,174 mln manatlıq xalis mənfəəti 14,973 mln manatlıq yığılmış zərərinə əlavə olunub və nəticədə, yığılmış zərər 13,799 mln manata enib.
Xatırladaq ki, “Bank BTB”nin səhmlərinin 74,99%-i Nigar Mehdiyevaya, 19,01%-i Rza Sadiqə (Müşahidə Şurasının sədri), 6%-i isə Tükəzban Mahmudovaya məxsusdur.
Könül
Ölkə.az
