Bankların vəziyyəti: Mənfəət aşağı düşüb, 1000-ə yaxın işçi götürülüb 

Azərbaycanda bank sektorunun 2021-ci il sentyabrın 30-na maliyyə vəziyyəti məlum olub.

“Ölkə.az”ın məlumatına görə, bank sektoru cari ilin ilk doqquz ayını 505,6 mln manat xalis mənfəətlə başa vurub. Bu isə ötən ilin sentyabr göstəricisi ilə müqayisədə 1,4% az, cari ilin avqust göstəricisi ilə müqayisədə 11,1% çoxdur.

Cari ilin sentyabrın 30-na bank sektorunun cəmi aktivləri 34 526,5 mln manat təşkil edib ki, bu da illik müqayisədə 12,8%, aylıq müqayisədə 3,3% çoxdur. Banklar tərəfindən müştərilərə verilmiş kreditlərin həcmi isə ötən ilin ilk doqquz ayı ilə müqayisədə 7,2%, cari ilin avqust ayı ilə müqayisədə 2,2% artaraq 15 538,7 mln manat təşkil edib.

Banklarda yerləşdirilən depozitlərin həcmi 23 650 mln manata qalxıb ki, bu da 2020-ci ilin eyni dövrü ilə müqayisədə 4,273 mlrd manat və ya 22% artım deməkdir. Cəmi öhdəliklərin həcmi isə illik müqayisədə 14,1% artaraq 29 655,2 mln manat olub.

Bank sektorunun cəmi kapitalı da illik müqayisədə 5,3% artaraq bu ilin sentyabrın 30-na 4 871,3 mln manat təşkil edib.

Bank filiallarının sayı illik müqayisədə 23 ədəd artıb və sentyabr ayının sonuna 466 ədəd olub, bank şöbələrinin sayı isə 13 ədəd azalaraq 103-ə enib. Bank ATM-lərinin sayında da artım müşahidə olunub. Belə ki, ötən ilin sentyabrında 2 640 ədəd olan bankomatlar 214 ədəd artaraq bu ilin doqquz ayın sonunda 2 854 ədəd olub.

Bank sektorunda çalışanların sayında da ciddi artım müşahidə olunur. Ötən ilin eyni dövrü ilə müqayisədə bank işçilərinin sayı 933 nəfər və ya 5% artaraq 19 488 nəfər təşkil edib.

Könül

Ölkə.az