Yerli bank əmək haqqı xərclərini 30% azaldıb
“AFB Bank” ASC 2021-ci ilin son rübünün yekunu üzrə maliyyə nəticələrini açıqlayıb.
“Ölkə.Az”ın məlumatına görə, bankın cəmi aktivləri 272,238 mln manat olub. Bu isə 2020-ci ilin yekunu ilə müqayisədə 3,3% azdır.
Bank tərəfindən müştərilərə verilən kreditlərin həcmi isə illik müqayisədə 21,6% azalaraq 142,787 mln manat təşkil edib.
Ötən ilin yekununda “AFB Bank” ASC-nin cəmi öhdəliklərinin həcmində də azalma müşahidə olunub. Belə ki, bankın cəmi öhdəlikləri 2020-ci ilin eyni dövrü ilə müqayisədə 6,5% azalaraq 191,056 mln manata düşüb.
Bankın öhdəliklərinin tərkibində depozit portfeli illik müqayisədə 6,1% azalıb və 117,272 mln manat təşkil edib. Bankın Mərkəzi Bank və dövlət fondları qarşısında öhdəlikləri 25% azalaraq 244,25 min manat olub.
“AFB Bank” ASC-nin cəmi kapitalı isə illik müqayisədə 5,3% artaraq 81,182 mln manat təşkil edib.
Sözügedən dövrə bankın faiz gəlirləri 2 dəfə azalaraq 13,967 mln manat olub, faiz xərcləri isə 1,752 mln manat olub. Nəticədə, bankın xalis faiz gəliri də 2 dəfə azalaraq 12,215 mln manat təşkil edib.
Qeyri-faiz gəlirləri 8,919 mln manat, qeyri-faiz xərcləri 16,985 mln manat olan bank qeyri-faiz xərclərinin tərkibində əmək haqqı xərclərini də azaldıb və 5,843 mln manata endirib. Mümkün zərərlər üçün xüsusi ehtiyatların yaradılmasına ayırmalarını 8,054 mln manat azaldaraq mənfəətini 12,203 mln manata qədər artıra bilib.
Mənfəətindən 2,9 mln manat vergi ödəyən “AFB Bank” ASC ötən ili 9,303 mln manat xalis mənfəətlə başa vurub.
Könül
Ölkə.Az
