“Expressbank” riskli aktivləri üçün 2 milyon manat ayırıb

“Expressbank” ASC 2021-ci ilin yekunları üzrə maliyyə nəticələrini açıqlayıb.

“Ölkə.Az”ın məlumatına görə, bankın cəmi aktivləri 351,368 mln manat olub. Bu isə 2020-ci ilin yekunu ilə müqayisədə 12,1% çoxdur.

Bank tərəfindən müştərilərə verilən kreditlərin həcmi isə illik müqayisədə 24,6% artaraq 261,439 mln manat təşkil edib.

Ötən ilin yekununda “Expressbank” ASC-nin cəmi öhdəliklərinin həcmində də artım müşahidə olunub. Belə ki, bankın cəmi öhdəlikləri 2020-ci ilin eyni dövrü ilə müqayisədə 18,3% artaraq 227,514 mln manata çatıb.

Bankın öhdəliklərinin tərkibində depozit portfeli illik müqayisədə 31,5% artıb və 156,083 mln manat təşkil edib. Bankın Mərkəzi Bank və dövlət fondları qarşısında öhdəlikləri 25% azalaraq 3,576 mln manat olub.

“Expressbank” ASC-nin cəmi kapitalı isə illik müqayisədə 2,3% artıb və 123,854 min manat təşkil edib.

Sözügedən dövrə bankın faiz gəlirləri 42,171 mln manat, faiz xərcləri isə 7,334 mln manat olub və nəticədə, bankın xalis faiz gəliri 34,837 mln manat təşkil edib.

Qeyri-faiz gəlirləri 13,832 mln manat, qeyri-faiz xərcləri 35,102 mln manat olan bank mümkün zərərlər üçün xüsusi ehtiyatların yaradılmasına 2,243 mln manat ayırıb.

Mənfəətindən 3,608 mln manat vergi ödəyən “Expressbank” ASC ötən ili 7,701 mln manat xalis mənfəətlə başa vurub.