Elman Rüstəmov devalvasiyadan danışdı: “Bu səhvlərdən nəticələr çıxarılıb”

"Azərbaycan 2008-ci ildə qlobal maliyyə böhranını uğurla atladı. Onun səbəbi isə neftin qiymətində kəskin enmə olsa da, tez bərpa olunması idi. 2014-ci ilin iyun ayından başlayaraq isə bu böhran dünyada neftə tələbin azalmasına, neft qiymətinin uzunmüddətli azalmasına səbəb oldu. Ümumilikdə, qiymət 4 dəfə azaldı. Belə şəraitdə tədiyyə balansında problemlər yaranmağa başladı". 

"Ölkə.Az" xəbər verir ki, bunu Azərbaycan Mərkəzi Bankının (AMB) sədri Elman Rüstəmov 10 milyard dollar vəsaitin manatın sabit saxlanmasına istifadə edilməsi məsələsinə münasibət bildirərkən deyib. O bildirib ki, neft qiymətləri ilə bağlı qeyri-müəyyənliklər proqnozlaşdırmanı çətinləşdirirdi:

"Ölkə strateji valyuta ehtiyatlarını itirmək təhlükəsi ilə üzləşdi. Qərar makroiqtisadi vəziyyət nəzərə alınaraq verildi. 4 il ərzində manatın məzənnəsinin korreksiyası üçün büdcəyə ildə 12 milyard dollar transfer edilirdisə, bu qərardan sonra bu xərclər 6 milyard dollara düşmüşdü. Keçən il 6,7 milyard dollara enib. Adı çəkilən 10 milyard dollar bütövlükdə bu dövrdə nağd vəsaitlərin dollarlaşmasına, banklardakı nağdsız vəsaitlərin dollarlaşmasına və s. sərf olundu. Bu da tədiyyə balansında defisitinin bağlanmasına yönəldilmişdi". 

"Həmin dövrdə müəyyən səhvlər buraxılmışdı. Bu səhvlərdən lazımı nəticələr çıxarılıb. Bundan sonra həmin təcrübə nəzərə alınaraq addımlar atılır", - deyə baş bankir deyib.