“Moody\'s” Azərbaycan bank sistemi üzrə proqnozlarını dəyişdi

“Moody's” beynəlxalq reytinq agentliyi Azərbaycan bank sektorunun kredit reytinqini yenidən “Baa3” səviyyəsində təsdiq edib, proqnozu isə “stabil”dən “neqativ”ə salıb.

Səbəb olaraq agentlik dünya neft bazarında qiymətlərin azalması və bank sektorunun əməliyyat mühitində zəifləmə, əsasən də aktivlərin keyfiyyəti, kapital, mənfəət və bankların maliyyələşməsində yaranan mənfi dinamikasını göstərib.

“Bank sistemləri üzrə proqnozlar: Azərbaycan” yeni məruzə www.moodys.com saytında dərc edilib.

Agentlik qeyd edib ki, 2014-cü ilin yekununda Azərbaycanda ÜDM-in 37%-i neft sektorunda formalaşıb. Azalan neft qiymətləri isə ölkə iqtisadiyyatına mənfi təsir göstərir.

“Moody's” bu il neftin orta qiymətinin 55 dollar/barel olacağını, Azərbaycan iqtisadiyyatının isə 1% azalacağını proqnozlaşdırır. İqtisadi artım isə ancaq 2016-cı ildə 1,7% səviyyəsində gözlənilir.

İqtisadi artımın 2014-cü ilin yekununda ÜDM-in 70%-ni təşkil edən valyuta ehtiyatlarından istifadə etməklə dövlət investisiyaları formasında stimullaşdırılması planlaşdırılır.

“Moody's”in iqtisadi təhlilçisi Mariya Malyukova bildirib ki, qeyri-neft sektorunun inkişaf etdirilməsi bank sektorunda əlverişli mühitin yaranması üçün əvəzolunmaz şərtdir.

Məruzəyə əsasən zəif iqtisadi mühitlə yanaşı, bu ilin fevral ayında yerli valyutanın devalvasiyası da banklara neqativ təsir göstərib.

“Xarici valyutada kredit götürən vətəndaşlar milli valyutada olan gəlirləri ilə kredit ödənişlərini həyata keçirməkdə çətinlik çəkirlər. Yüksək inflyasiya isə istehlak bazarının daralmasına səbəb olub. Bankların kreditləşməni azaltması problemli kreditlərdə bu il 15% artıma səbəb olacaq”, - deyə M.Malyukova bildirib. Qeyd edək ki, 2014-cü ildə problemli kreditlərdə artım 11,4% olub.

Bununla yanaşı, “Moody's” qeyd edir ki, valyuta aktivlərinin yenidən qiymətləndirilməsi və valyuta kreditlərindəki itkilər Azərbaycan banklarının mənfəət və kapitallaşmasına mənfi təsir göstərəcək. Agentlik bankların bu il kredit xərclərinin məcmu kreditlərin 3%-ni təşkil etməsini və bunun da bankların daha öncəki mənfəətlərini əritməsi ehtimalı yaradır. Bu il valyuta aktivlərinin yenidən qiymətləndirilməsi nəticəsində bank kapitallaşmasının 2% azalacağı proqnozlaşdırılır.

Buna baxmayaraq, gözlənilən itkiləri ödəyə biləcək etibarlı banklar yetərincə olacaq. Devalvasiya əmanətçilərin etibarını zəiflədib. Getdikcə daha çox insan əmanətini xarici valyutaya çevirir, bu isə bank aktivləri və xarici valyutada öhdəçiliklər arasında məsafəni daha da artırır”, - Malyukova bildirib.oxu.az

Ölkə.Az