Moped sürücüləri ilə artan davalar: problem belə həll olmalıdır

Azərbaycanda son dövrlər şəhər yollarında yaranan qəza vəziyyətlərinin bir hissəsi məhz mopedlərin iştirakı ilə baş verir. Həmçinin avtomobil və moped sürücüləri arasında ziddiyyətli məqamlar və anlaşmazlıqlara da tez-tez rast gəlmək olur.

Bəs sözügedən problemlərin yaranma səbəbi nədir?

Nəqliyyat sahəsi üzrə ekspert Eldəniz Cəfərli “Ölkə.Az”a açıqlamasında bildirdi ki, vaxtilə Bakı şəhərində moped sayı indiki qədər deyildi. Pandemiya dövründə daşınma xidmətləri ilə bağlı mopedlərin sayının artması bu məsələni aktuallaşdırıb.

Mopedlər və avtomobil sürücüləri arasında yaranan anlaşmazlıqlara toxunan ekspert mopedlərlə bağlı bəzi tələblərin qoyumasını zəruri hesab edib: 

Mopedlər icbari sığortaya cəlb olunmalıdır

“Son vaxtlarda mopedlərin iştirakı ilə qəzaların sayı və vətəndaşlara dəyən zərərlər artıb. Belə ki, mopedlərin mühərrik həcmi 50 kubmetrdən kiçik olduğu üçün onlar icbari sığortaya cəlb edilmirlər. Həmçinin onların dövlət nömrə nişanı, sürücülərinin sürücülük vəsiqələri yoxdur. Moped sürücüsü öz nəqliyyat vasitəsilə digər avtomobilə zərər vurduqda mülki məsuliyyətin icbari sığortası olmadığı üçün bu avtomobilin zərəri ödənilmir. Burada da müəyyən problemlər yaranır”.

Mopedlərə dövlət nömrə nişanı verilməli və ya xüsusi identifikasiya nömrəsi təyin edilməlidir

E. Cəfərlinin sözlərinə görə, mopedlər vasitəsilə baş verən nəqliyyat hadisələrində, əgər moped sürücüsü hadisə yerindən çıxıb gedirsə, daha sonra dövlət yol polisi əməkdaşları həmin şəxsin vaxtında aşkar edilməsində çətinlik çəkə bilərlər: “Çünki onların dövlət nömrə nişanı və sürücülük vəsiqəsi olmur. Bu zaman ya mopedlərə dövlət nömrə nişanı verilməlidir, ya da xüsusi identifikasiya nömrəsi təyin edilməlidir ki, həm onlar icbari olaraq sığortalansın, həm də moped sürücülərindən icbari sığorta haqqı tutula bilsin və qəza zamanı onlar məsuliyyətə cəlb edilsin”.

Mopedlər bir sıra tələblərə əməl etməlidir

“Moped sürücüləri bilməlidirlər ki, onlar şəhərdə və magistral yollarda yolun yalnız sağ zolağı ilə hərəkət etməli, yolun ortası və ya sol zolağı ilə hərəkət etməməlidirlər. Onların sürət həddi də 60 km/saatı aşmamalıdır. Təəsüf ki, müsair mopedlərin mühərriklərinin həcmi kiçik olsa da, güclüdür və saatda 80-100 km/saata qədər sürətlənə bilirlər. Bu səbəbdən moped sürücüləri yollarda olduqca sürətlə hərəkət edirlər ki, bu da qəzalar zamanı ağır fəsadlara səbəb olur”, - deyə ekspert əlavə edib.

Könül
Ölkə.Az