Mətn ölçüsü:
  • 100%

Bakının “hər gün qəza baş verən yolu” düzəlir - AÇIQLAMA

Paytaxtın Nəsimi rayonu, “Papanin körpüsü” adlanan ərazidə tez-tez qəzalar baş verir. Daha dəqiq desək, yol-nəqliyyat hadisələri Abdulvahab Salamzadə və Ceyhun Səlimov küçəsinin kəsişməsində qeydə alınır.

“Ölkə.Az” xəbər verir ki, bununla bağlı sosial şəbəkələrdə çoxlu sayda şikayətlər səsləndirilir. 

“Yolun bu hissəsi yenidən asfaltlandıqdan sonra hərbi hospital tərəfdən gələn yoldan sola, Tbilisi prospektinə dönmə zolağı açılıb. Bu, 3-cü mikrorayon dairəsinə gedən yolda tıxacı xeyli azaldıb, amma təəssüf ki, qəzaların sayı artıb. Az qala hər gün körpünün altında toqquşma olur və bunun əsas səbəbi sürücülərin yol nişanlarına məhəl qoymamasıdır. Kim haradan istəyir, oradan da dönür, başqasının yoluna çıxır və sairə. Günün müəyyən saatlarında Yol Polisi Xidməti əməkdaşları körpünün altında dayanır deyə sakitlik olur, amma onlar gedəndən sonra ərazidə hərəkət “öz axar”ına düşür. Yolda bir neçə istiqamətdə piyada keçidi var və bir çox hallarda piyadalara da məhəl qoyulmur”, - deyə şikayətlərin birində qeyd olunub.

Bakı Nəqliyyat Agentliyi (BNA) məsələ ilə bağlı “Ölkə.Az”a açıqlamasında bildirdi ki, bu ərazidə hərəkətin işıqforla nizamlı hərəkəti təşkil olunacaq.

“Artıq işıqforların quraşdırılması üçün zəruri kommunikasiya xətlərinin çəkilişi yekunlaşıb. Bununla yanaşı yaxın günlərdə kəsişmədə mövcud şəraitə uyğun yol nişanları da quraşdırılacaq”, - deyə açıqlamada bildirilib.

Qeyd edək ki, sözügedən yolla bağlı atılacaq addım ilk dəfə saytımıza açıqlanıb.

Könül
Ölkə.Az