Qəzada yaralananların xərcini kim ödəməlidir? - RƏSMİ
Dünən Bakı-Şamaxı yolunda baş verən ağır qəzada dəymiş zərərin, eləcə də xəsarət alan şagirdlərin müayinə və müalicəsi xərclərinin kimin tərəfindən ödənilməsi də sual doğuran məqamlardan biridir.
Belə ki, turda iştirak edən 279 nömrəli məktəbin şagirdlərinin valideynləri ilə tur şirkəti arasında da mövcud məsələ ilə bağlı insident olub.
Dövlət Turizm Agentliyinin sədrinin müşaviri Kənan Quluzadə “Ölkə.Az”a açıqlamasında bildirdi ki, “Turizm haqqında” yeni qəbul olunan qanunun alt sənədləri hazır olduqdan sonra turizm şirkətləri tərəfindən öz müştərilərini sığortalamaq məcburi olacaq:
“Hazırda isə sığorta könüllüdür. Turizm şirkətləri ilə sığorta şirkətləri arasında müqaviləyə əsasən burada yol qəzaları hallarının sığorta halına salınıb salınmayacağı da müzakirə predmetidir. Xüsusi hal kimi sığorta şirkətləri bunu qəbul etməyə bilər.
Yeni qanunla turizm şirkətləri üzrə mülki məsuliyyətin icbari sığortası olacaq. Bu sığortanın paketinə daxil edilən məsələlər turizm və sığorta şirkətlərinin razılığı ilə hazırlanacaq”.
Qurum nümayəndəsinin sözlərinə görə, 2015-ci ildən turizm sahəsində lisenziyalar ləğv edilib, buna görə də şirkətlər seçimlərində sərbəstdirlər: “Sözügedən qəza halında zərərin qarşılanması üçün tur şirkətinin müştərilərini sığorta edib-etməməsi dəqiqləşdirilməlidir”.
Sığorta sahəsi üzrə ekspert İlkin İbrahimov isə “Ölkə.Az”a açıqlamasında bildirdi ki, ölkəmizdə səyahət sığortası könüllü sığortadır: “Bir neçə il əvvəl daxili turizmdə səyahət sığortasının məcburi oması ilə bağlı işlər görülməyə başlayıb, hazırda isə bu sığorta növü könüllüdür. Həmçinin rayonlararası, şəhərlərarası və ölkələrarası nəqliyyat vasitərinin hərəkəti ilə bağlı sərnişinlərin icbari sığortası mövcuddur. Kommersiya xarakterli hərəkət edən avtomobillər həmin sığorta növü ilə sığortalana bilər”.
“Ötən gün baş verən qəzada da nəqliyyat vasitəsi sərnişinlərin icbari sığortası ilə sığortalanmış olsaydı sığorta şirkətindən kompensasiya almaq mümkün olardı. Əlavə olaraq fərdi qəza sığortası ilə də zərərin qarşılanması mümkündür”,- deyə ekspert əlavə edib.
Könül
Ölkə.Az
