İran Səudiyyə Ərəbistanının neft siyasətini sərt tənqid atəşinə tutdu

Ölkə.az İranın "Mehr" agentliyinə istinadən məlumat verir ki, İran Milli Neft Şirkəti, dünya bazarlarında xam neft qiymətlərinin aşağı düşməsi ilə birlikdə Neft İxrac edən Ölkələr Təşkilatının (OPEC) ən böyük neft istehsalçısı və ixracatçısı olan Səudiyyə Ərəbistanının, dünya bazarlarında neftin qiymətinin hər barelinə görə bir dollar aşağı salmasını sərt tənqid edib. 

İran Milli Neft Şirkətinin səlahiyyətlisi bilidirib ki, ABŞ-ın "Qlobal Enerji Bazarı" mütəxəssisləri Səudiyyə Ərəbistanın hasilatı artırdığını və bunun nəticəsində də neftin qiymətlərinin aşağı düşdüyünü bildiriblər.

Analitiklər bunun ABŞ-ın ən yaxın müttəfiqi kimi Səudiyyə Ərəbistanının Ağ Evə Moskvaya "qulaqburması verməkdə" kömək etməsi kimi qiymətləndirirlər. Neftin qiymətlərinin isə ABŞ və Səudiyyə Ərəbistanının ortaq şirkəti olan ARAMCO-nun səyləri nəticəsində aşağı düşdüyü deyilir. Qeyd edək ki, adı çəkilən şirkət bu gün Asiya birjalarında neftin qiymətini bir dollaradək aşağı salıb.

İran Milli Neft Şirkətinin  rəsmisi, Səudiyyə Ərəbistanı tərəfindən Asiya bazarlarında ucuz, pərakəndə və hərrac qiymətlərinə satılan neftin qaydalara uyğun olmadığına toxunaraq, mövcud vəziyyətdə İranın xam neft və qaz məhsulları ixracatının normal həcmdə olduğunu və qiymətləri aşağı salmağa ehtiyacın olmadığını bildirib.

Xatırladaq ki,bundan əvvəl də İran Milli Neft Şirkətinin  Beynəlxalq əlaqələr şöbəsinin müdiri Seyyid Muhsin Kemsari, İranın xam neft ixracatının ilin ilk altı ayı ərzində illik büdcə hədəflərinə çatdığını bəyan etmişdi.

Ziya Rəhmanov

Ölkə.az