"Dördgünlük iş rejimi məhsuldarlığın azalması deməkdir"

Bu gün  “4 günlük iş həftəsi” başlıqlı yazılar insanların olduqca diqqətini çəkdi. İşləməkdən bezən, istirahətinə daha çox zaman ayırmaq istəyənlər yayılan xəbərə olduqca maraqlı reaksiya verdilər. 

Ancaq Vətəndaşların əmək hüquqları Liqasının sədri Sahib Məmmədov “AzadlıqRadiosu”na müsahibəsində  “4 günlük iş həftəsi hələ ki, bəşəriyyətin arzusu olaraq qalacaq”  deməsi həmin sevinci tez sonlandırdı.

Bəs, ümumilikdə bu hadisə baş verərsə, bunun ölkələrin iqtisadiyyatına təsiri necə olar?

Ölkə.Az-a danışan iqtisadçı ekspert Vüqar Bayramlının sözlərinə görə, 4 günlük iş rejimi bir sıra mənfi iqtisadi təsirləri baxımından heç də arzuolunan deyil. 

"4 günlük iş rejiminin bir sıra mənfi iqtisadi təsirləri olduğundan heç də arzuolunan deyil. 4 günlük iş rejiminə keçirilmə birmənalı şəkildə məhsuldarlığı azalda bilər. Bu cür iş rejimi həmçinin işçilərin tənbəlləşməsinə gətirib çıxardır. Həftənin 7 gün olduğunu nəzərə alsaq 3 günlük istirahətin işçilərin çox ciddi tənbəlləşməsinə səbəb olacağı aydındır. Bu baxımdan da bu arzuolunan deyil". 

5 günlük iş rejimi və 2 günlük istirahətin olması artıq psixoloji oturuşmuş sxemadır

"Digər tərəfdən istehsalla məşğul olan sektorlarda geriləmə müşahidə oluna bilər. Daha az zaman sərf edilməsi istehsalın azalması deməkdir. İstehsalın azalması baxımından 4 günlük iş sistemi heç də ürəkaçan deyil. Mövcud 5 günlük iş rejiminin saxlanması inkişaf baxımdan daha uğurludu. 5 günlük iş rejimi və 2 günlük istirahətin olması artıq psixoloji oturuşmuş sxemadır".

Qeyd üçün deyək ki, 4 günlük iş sistemi nə qədər qulağa xoş səslənsə də, bu sosial gərginlik, şəxsiyyəti deformasiyaya uğradan başlıca səbəb ola bilər.

Fatimə İbrahimova

Ölkə.az